Tafir hjá Samgöngustofu: Aukið fé til hugbúnaðarþróunar og yfirvinna lengd

Samgöngustofa hefur komið á sérstakri aðgerðaáætlun til að bregðast við mikilli aukningu í forskráningu ökutækja sem hefur valdið aukinni bið eftir skráningu.

Í tilkynningu frá Samgöngustofu segir að áætlunin sé tvíþætt og miði annars vegar að tafarlausu viðbragði og hins vegar að lausn til lengri tíma. Aðstoð starfsfólks úr öðrum deildum Samgöngustofu verður aukin til muna og yfirvinna lengd um kvöld og helgar.

„Samhliða verður meiri fjármunum en gert hafði verið ráð fyrir, ráðstafað til hugbúnaðarþróunar, í því skyni að flýta rafrænum lausnum sem hafa verið í vinnslu um tíma. Þessar hugbúnaðarlausnir fela það í sér að bílaumboð muni sjálf geta forunnið forskráningar fyrir innflutt ökutæki og þar með minnkað álag og stytt bið annarra innflytjenda,“ segir í tilkynningunni.

Kemur fram að fjöldi lögbundinna frídaga í kringum páska hafi reynt mikið á biðlundina og hafi Samgöngustofa mikinn skilning á þeirri röskun sem þetta hafi haft í för með sér fyrir innflytjendur ökutækja.

„Fram til þessa hefur verið brugðist við með aukinni yfirvinnu starfsfólks í skráningum, auk þess sem aðstoð hefur verið fengin frá öðrum deildum til að sinna verkefninu en það hefur ekki dugað til að mæta þessari miklu fjölgun skráninga. Í því skyni að bregðast enn frekar við ástandinu hefur nú verið gerð sérstök aðgerðaráætlun sem miðar að því að mæta þessari fjölgun skráninga og flýta þeim eins og kostur er.“