Hægt að greiða með snjallsíma við búðarkassann

Íslenskir neytendur geta nú greitt fyrir vörur og þjónustu án þess að þurfa nokkurn tímann að taka upp seðla eða greiðslukort. Með nýrri tækni er hægt að greiða við afgreiðslukassa með snjallsímann einan að vopni.

Til þess að nota þjónustuna hleður notandinn greiðslukortum sínum inn í sérstakt forrit þar sem það vistast með öllum tilheyrandi upplýsingum. Þegar kemur að því að greiða þarf svo einfaldlega að skanna QR kóða við afgreiðsluborðið og samþykkja greiðslu.

Fjarskiptafyrirtækið Síminn hefur nú innleitt slíka þjónustu í smáforrit, sem er þó opið öllum farsímanotendum, og eru fjölmargir söluaðilar á landinu þegar farnir að taka við snjallsímagreiðslum. Forstjóri Símans segir senn koma að því að enginn þurfi að ganga um með greiðslukort.

„Fólk tekur mjög hratt eftir því ef það týnir símanum sínum en það er hins vegar miklu lengur að finna það út ef það týnir korti. Þannig að þeir sem byrja að nota þetta verða mjög ginnkeyptir fyrir því að gera það áfram. En hins vegar er eins með þessar breytingar eins og allar að það tekur tíma og það eru mismunandi notkunarmynstur, þannig það er ekki eins og kortin muni hverfa á morgun en þau munu gera það með tímanum,“ segir Orri Hauksson, forstjóri Símans.

Orri þvertekur fyrir að öryggi í greiðslum skerðist með tækninni.

„Við teljum þetta vera öruggara en kort. Ef þú týnir kortinu þínu þarf einhver bara að vita Pin-númerið og í sumum tilfellum ertu með snertilaust kort þar sem það þarf ekki einu sinni Pin. Í þessu tilfelli þarftu að geta opnað símann, þú þarft að geta opnað appið, annaðhvort með öðru pin númeri eða þínu fingrafari. Þannig það er tvöfalt öryggi í þessu en einfalt öryggi í öðru að okkar mati.“