Reyndi ítrekað að komast inn á Barnaspítalann

Maður í annarlegu ástandi reyndi ítrekað að komast inn á Barnaspítala Hringsins við Hringbraut um klukkan fimm í morgun. Maðurinn neitaði að fara er öryggisverðir höfðu afskipti af honum. Hann neitaði jafnframt að gefa lögreglu upp kennitölu sína og vildi ekki framvísa skilríkjum. Maðurinn var handtekinn og vistaður sökum ástands í fangageymslu lögreglu. Þetta kemur fram í dagbók lögreglunnar á höfuðborgarsvæðinu.

Þá voru afskipti höfð af konu í miðbæ Reykjavíkur þar sem hún var að kasta af sér vatni á tröppum Alþingishússins. Konan var kærð fyrir brot á Lögreglusamþykkt fyrir Reykjavíkurborg.

Lögregla hafði einnig afskipti af konu og manni á heimili í Vesturborginni á tíunda tímanum í gærkvöldi vegna vörslu fíkniefna. Þau voru síðan vistuð fyrir rannsókn máls í fangageymslu.