Rólegra en undanfarnar nætur á Suðurlandi

Nóttin var mun rólegri en undanfarnar nætur hjá lögreglunni á Suðurlandi. Talsvert hefur fækkað á tjaldsvæðum í Árnessýslu en hvorki fíkniefnamál né líkamsárásir komu til kasta lögreglu í nótt að því er segir í Facebook-færslu lögreglunnar á Suðurlandi. Þá var einnig allt með nokkuð kyrrum kjörum hjá lögreglu á Norðurlandi eystra og 

Lögregla stöðvaði einn ökumann undir áhrifum áfengis og einn án ökuréttinda auk þess sem nokkrir voru kærðir fyrir of hraðan akstur. Mjög öflugt eftirlit með ölvunar- og fíkniefnaakstri var viðhaft í uppsveitum, sem og við Landeyjahöfn.

Minni ölvun og vímu að sjá á gestum tjaldsvæða

Hvorki fíkniefnamál né líkamsárásir komu til kasta lögreglu í nótt.

„Var það samdóma álit lögreglumanna að mun minni ölvun og vímu hafi verið að sjá á gestum tjaldsvæða en undanfarnar nætur,“ segir í færslu lögreglunnar á Suðurlandi.

Mikið annríki hefur verið hjá lögreglu á Suðurlandi um helgina en ástandið var einna verst á tjaldsvæðinu á Flúðum, eins og fjallað var um á Vísi. Fjöldi fíkniefna- og ofbeldismála komu upp síðustu daga og þá blasti gríðarlegt rusl við mönnum á öðru tjaldsvæðinu í gær. Lögreglumenn höfðu ítrekað þurft að stilla til friðar og fyrirbyggja að upp úr syði milli gesta.

Þá mun lögregla halda uppi öflugu eftirliti í dag með ölvunar- og vímuefnaakstri og „hvetur því ökumenn að huga vel að ástandi sínu eftir skemmtanahald helgarinnar, gefa sér góðan tíma til heimferðar og leggja ekki af stað nema allsgáðir og úthvíldir.“

Allt með kyrrum kjörum á Norðurlandi eystra og á Vestfjörðum

Varðstjóri hjá lögreglunni á Norðurlandi eystra segir nóttina hafa verið sallarólega í umdæminu. Enginn gisti fangaklefa á Akureyri í nótt en einn ökumaður var stöðvaður grunaður um akstur undir áhrifum fíkniefna.

Þá gekk nóttin hjá lögreglunni á Vestfjörðum „svakalega vel fyrir sig,“ að sögn varðstjóra. „Helgin er bara lyginni líkust hjá okkur, klefarnir voru tómir alla helgina.“

Umferð á Vestfjörðum er jafnframt enn með kyrrum kjörum en varðstjóri segir eitthvað af fólki hafa lagt af stað heim í gær. Hann bindur því vonir við að umferð verði ekki með fullum þunga í dag.