Meira kynþáttaníð í háskólaboltanum en í NBA

Íslandsvinurinn Jeremy Lin hjá Brooklyn Nets hefur mátt þola alls konar kynþáttaníð í körfuboltanum.

Lin er fyrsti Bandaríkjamaðurinn af kínverskum uppruna sem kemst í NBA-deildina og honum fannst hann ekki alltaf vera velkominn á vellinum.

Hann spilaði með Harvard-háskólanum áður en hann komst í NBA og þar fékk hann að heyra það.

„Það var verst að spila í Cornell þar sem menn voru óhræddir við að nota öll blótsyrði sem til eru um fólk af asískum uppruna,“ sagði Lin.

„Ég svaraði aldrei fyrir mig heldur dró mig inn í skel þegar svona gekk á. Ég var kallaður hrísgrjón og fleira í þeim dúr. Einnig var gert grín að augunum mínum. Var spurður að því hvort ég sæi yfir höfuð á stigatöfluna með svona augum. Það var aldrei neitt gert í þessu. Það var sorglegt.“

Lin segir að jafnvel þjálfarar hafi uppnefnt hann við dómara án þess að dómararnir hafi nokkuð gert. Í NBA-deildinni sé síðan miklu minna um svona viðbjóð.