Valdimar Örn segist bera virðingu fyrir konum og kvennaknattspyrnu

Valdimar Örn Flygenring, leikari með meiru, á í vök að verjast í athugsemdakerfi DV. Hann segist bera mikla virðingu fyrir konum og kvennaíþróttum en allt kemur fyrir ekki.

Valdimar Örn vann sér það til óyndis að hafa sett fram þá hugmynd hvort ekki væri betra ef mörkin í kvennaknattspyrnunni yrðu minnkuð og jafnvel völlurinn einnig. Þetta setti hann fram á Facebook-síðu sinni í gær og spannst talsvert umræða um þetta. Svo virðist sem margir vilji ekki skilja Valdimar Örn og telja þetta hina mestu ósvinnu, að voga sér að setja þetta fram.

Klara hjá KSÍ gefur ekki mikið fyrir hugmyndir Valdimars

DV gerði sér mat úr málinu og er Klara Bjartmarz, framkvæmdastjóri KSÍ, kölluð til en hún gefur lítið fyrir þessar hugmyndir leikarans og finnst þær vart svaraverðar. Ekki er hægt að skilja hana öðru vísi en svo að henni finnist Valdimar Örn stútfullur af kvenfyrirlitningu. Klara segir að reglur um stærð valla og marka séu settar af FIFA. Klara bendir á að FIFA hafi ekki séð ástæðu til að gera breytingar og láta konur spila á minni völlum. Þess má svo geta að það styttist í að Stelpurnar okkar taki þátt í lokamóti Evrópukeppninnar sem fram fer í sumar.

„Ég fagna því hins vegar að við eigum glæsileg karla- og kvennalið á heimsmælikvarða og ég sé enga ástæðu til að bera þau saman. Það er það sem skiptir máli, ekki það sem Valdimar segir á Facebook,“ hefur DV eftir Klöru.

Valdimar á í vök að verjast

Valdimar Örn veit varla hvaðan á sig stendur veðrið og reynir að bera hönd yfir höfuð sér á athugasemdakerfinu. Hann segir Klöru gersamlega misskilja sig og gera lítið úr vangaveltum sínum sem settar voru fram af einlægni og virðingu fyrir leiknum – og virðingu fyrir konum.

„Frábært svar hjá KSÍ „að við eigum lið á heimsmælikvarða“ einsog ég sé eitthvað að halda öðru fram?“ spyr Valdimar Örn og telur umræðuna komna á sérdeilis sérkennilegan stað. Og hann furðar sig á boði Klöru, sem vill fá hann á leik með kvennalandsliðinu.

Hefur oft horft á kvennafótboltann

„Ég hef oft séð konur spila fótbolta. Og veit alveg að við eigum flott lið. Það er engin að gera lítið úr kvennafótbolta.... En ef að t.d. markvörðurinn nær ekki einusinni að hoppa uppí slánna þá hlýtur eh að vera bogið við stærðarhlutföllin....enda voru þau búin til af köllum fyrir kalla!!!!“

Valdimar Örn segir afneitun að halda öðru fram. „Ég ætlaði ekki að móðga neinn með þessu. Ég ber mikla virðingu fyrir konum og kvennaíþróttum almennt og finnst stelpurnar okkar vera alveg frábærar. Ég spilaði sjálfur fótbolta á mínum yngri árum bæði úti og í marki og hef horft á fótbolta í svona u.þ.b. 50 ár og haft gaman af. Það að 156cm kona sem æfir mark geti með réttri þjálfun staðið miklu stærri karlmanni, með samskonar þjálfun vænti ég, algerlega á sporði finnst mér eiginlega fáránlegt að reyna að halda fram og í raun svari sér sjálft,“ segir Valdimar Örn meðal annars, og á í vök að verjast.