Nespresso-verslun opnar í Kringlunni

Stefnt er að því að Nespresso-verslun opni í Kringlunni þann 1. desember næstkomandi. Þetta kemur fram í ViðskiptaMogganum í dag.

Þar segir að netverslun verði opnuð í nóvember en að verslunin sjálf muni opna í desember. Jóhanna Sævarsdóttir hefur verið ráðin framkvæmdastjóri og stefnt er að því að ráða kaffisérfræðinga í allt að tólf stöðugildi á næstu mánuðum.

Verslanir Bónus hófu í síðustu viku að selja Nespresso kaffihylki í Nespresso kaffivélar. Áður hafa Nespresso kaffivélar verið seldar á landinu en eigendur þeirra þurft að kaupa kaffihylkin erlendis eða flytja þau til landsins í gegnum póstinn með því að versla á vefsíðu svissneska fyrirtækisins eða í erlendum sérverslunum. Verslunin Fitness Sport hefur þó selt kaffihylkin af og til.

Slík kaffihylki eru þó ekki óumdeild og eru þau sums staðar bönnuð. Milljarðar þeirra hafa verið framleiddir og er stór hluti þeirra urðaður eftir að þeim er hent í ruslið. Mikil umræða hefur farið fram um umhverfisáhrif hylkjanna undanfarin ár enda hefur reynst erfitt að endurvinna þau.