Festi vill selja Nespresso hylkin

Verslunarfyrirtækið Festi hf. á samkvæmt heimildum Markaðarins í viðræðum um innflutning á Nespresso kaffihylkjum. Einnig skoðar fyrirtækið opnun verslunar sem myndi eingöngu selja hylkin sem eru nokkuð eftirsótt hér á landi.

Jón Björnsson, forstjóri Festar, vildi ekki tjá sig um viðræðurnar eða hvort fyrirtækið væri búið að tryggja sér umboðið á hylkjunum. Nespresso kaffivélar hafa verið fáanlegar hér á landi um árabil en hylkin einungis á vefsíðu svissneska fyrirtækisins eða í erlendum sérverslunum. 

Erlendis er kaffið selt í verslunum sem er oft líkt við skartgripabúðir þar sem mikið er gert úr íburði. Kaffihylki sem seld eru í Nespresso vélar hér á landi koma aftur á móti frá öðrum framleiðendum fyrir utan verslunina Fitness Sport sem hefur selt þau af og til.