Lýður hættir sem stjórnarformaður Bakkavarar

Lýður Guðmundsson, annar aðaleiganda Bakkavarar Group Limited, er sagður ætla að stíga til hliðar sem stjórnarformaður fyrirtækisins. Fyrrverandi forstjóri leikafangaverslunarinnar Hamleys, sem er stjórnarmaður í Bakkavör, mun taka við stöðu formanns.

Breytingin er sögð gerð í aðdraganda skráningar Bakkavarar á hlutabréfamarkað í Lundúnum og telja heimildarmenn Reuters að fyrirtækið gæti verið metið á rúmlega 280 milljarða króna.

Orðrómur um skráningu Bakkavarar, sem einblínir á framleiðslu tilbúinna máltíða, hefur verið hávær frá því í upphafi árs. The Sunday Times greindi frá fyrirætlununum um miðjan janúar en forsvarsmenn fyrirtækisins hafa ekki viljað tjá sig um málið.

Engu að síður er búist við því að tilkynnt verði um skráninguna fljótlega, jafnvel í næstu viku, enda hafi fjöldi stórra fjármálafyrirtækja; á borð við Morgan Stanley, HSBC, Barclays, Citigroup, Rabobank og Peel Hunt, unnið að henni undanfarna mánuði.

Burke við stjórnvölinn er Baugur keypti

Samhliða skráningunni verði tilkynnt um stjórnarformannsbreytinguna. Lýður dragi sig í hlé og Simon Burke komi í hans stað. Er breytingin sögð í frétt Reuters gerð í samræmi við bresk lög sem kalli á óháðan stjórnarformann. Burke ætti að vera öllum hnútum kunnugur í fyrirtækinu enda hefur hann setið í stjórn þess frá því í desember. Hann fór með tögl og hagldir í Hamleys þegar Baugur keypti leikfangaverslunina árið 2003. Það er nú í eigu hins kínverska C. Banner.

Lýður og bróðir hans, Ágúst Guðmundsson, eiga meirihluta í Bakkavör en Ágúst er jafnframt forstjóri fyrirtækisins. Bræðurnir gerðu ásamt Baupost Group tilboð í um 1,5 prósenta hlut í Bakkavör Group í febrúar í fyrra. Hluturinn var í eigu 2.800 íslenskra hluthafa og metinn á 900 milljónir króna. Bræðurnir og meðfjárfestar þeirra höfðu þá nýverið náð nánast fullum yfirráðum yfir Bakkavör á ný.