Kvartanir vegna skilareglna H&M á borði Neytendasamtakanna

Gera má ráð fyrir fjölda fólks sem vill skila og skipta jólagjöfum í verslunum á næstu dögum en á hverju ári fá Neytendasamtökin fyrirspurnir um skilarétt neytenda.

Brynhildur Pétursdóttir, framkvæmdastjóri Neytendasamtakanna, segir lög um skilarétt ekki skýr heldur leiðbeinandi. 

„Alla jafna hafa neytendur rétt á að skila og skipta vörum. En vandamálið sem við erum að fá inn á okkar borð varðar útsölur í janúar, hvort neytendur hafi þá rétt á upphaflegu verði eða útsöluverði. Samkvæmt leiðbeinandi reglum sem gefnar voru út fyrir margt löngu er reglan sú að neytandi eigi rétt á upphaflegu verði en hægt er að setja skilyrði um að inneignarnótan sé ekki notuð fyrr en útsölu lýkur," segir Brynhildur.

Nú þegar hafa Neytendasamtökunum borist kvartanir og fyrirspurnir um skilareglur H&M á Íslandi en þar má ekki skila fylgihlutum sem keyptir eru í versluninni, svo sem hálskrögum, skarti og töskum.

Brynhildi finnst undarlegt að verslunin fylgi ekki leiðbeinandi reglum á Íslandi.

„Þegar verslanir eru með reglur sem eru á skjön við það sem almennt gerist ættu þær að minnsta kosti að auglýsa þær mjög vel. Þannig að viðskiptavinir viti að hverju þeir ganga og komið sé í veg fyrir að pirra viðskiptavinina,“ segir Brynhildur Pétursdóttir.