Frumkvæðið að bónusgreiðslum Klakka komið frá erlendum vogunarsjóði

Kaupaukagreiðslur eignarhaldsfélagsins Klakka koma frá erlendum hluthöfum félagsins. Ríflega 80 prósent hlutafjár félagsins er í eigu erlendra aðila, beint eða óbeint. Markaðurinn, fylgirit Fréttablaðsins greindi í morgun frá því að stjórnendur Klakka hefðu samþykkt á mánudag kaupaukakerfi sem felur í sér bónuspott til stjórnenda félagsins upp á 550 milljónir króna vegna fyrirhugaðrar sölu á Lykli og vegna annarra eigna félagsins.

Í tilkynningunni segir orðrétt:

Það er skiljanlegt að stórar upphæðir eins og þær sem nefndar hafa verið sem mögulegar kaupaaukagreiðslur hjá Klakka vekji athygli og spurt sé hver taki ákvörðun um þær. Svarið við því er eigendur félagsins. Ríflega 80% hlutafjár Klakka er, beint og óbeint, í eigu erlendra aðila og er frumkvæðið að kaupaukagreiðslunum alfarið þeirra þó að stjórn hafi fjallað um útfærsluna og að beiðni þeirra lagt hana fyrir hluthafafund til samþykktar.

Þá skal minnt á að þær upphæðir sem fram hafa komið í fjölmiðlum eru ekki endanlegar heldur eru það hámarksgreiðslur vegna heildareigna Klakka sem koma aðeins til ef mjög hátt verð fæst fyrir Lykil. Greiðslurnar geta orðið mun lægri eða jafnvel engar. Sérstök áhersla er á að kynna söluferli Lykils fyrir erlendum kaupendum og eigendur Klakka telja mikilvægt að allir sem að sölunni komi hafi beina fjárhagslega hagsmuni af því að sem allra hæst verð fáist fyrir félagið, eigendum þess til hagsbóta.

Formanni VR misbýður greiðslurnar

Í kjölfar greinar Markaðarins hvatti Ragnar Þór Ingólfsson, formaður VR, til mótmæla fyrir utan höfuðstöðvar Klakka í Ármúla. Spyr hann hvort að fólk hafi áhuga á því að mæta fyrir utan húsið og þeyta bílflautum í mótmælaskyni.

Sjá einnig: Boðar til mótmæla vegna fyrirhugaðra bónusgreiðslna Klakka

Ragnar liggur ekki á skoðunum sínum vegna greiðslanna.

„Að stjórnendur skuli voga sér að þiggja slíka bónusa er ekki bara grátlegt heldur algjörlega siðlaust. Þeim væri nær að skila þessum peningum til þeirra sem enn eiga um sárt að binda vegna þess skaða sem fyrirtækin ollu íslensku samfélagi. Að ofurlaunaðir stjórnendur skuli hugsanlega taka til sín allt að 60 milljónir hver í bónusgreiðslur er ekkert annað en viðbjóðslegt.“

Stærsti eigandi Klakka er vogunarsjóðurinn Davidson Kempner, í gegnum írska skúffufyrirtækið Burlington Loan Management, en samanlagt á sjóðurinn um 75 prósenta hlut í félaginu. Vogunarsjóðurinn, sem var einn stærsti kröfuhafi föllnu viðskiptabankanna, bætti verulega við eignarhlut sinn í félaginu í fyrra þegar hann keypti samanlagt rúmlega 60 prósenta hlut af Arion banka, Lindarhvoli, eignarhaldsfélagi ríkissjóðs, og Glitni HoldCo.

Auk ýmissa íslenskra lífeyrissjóða eru aðrir hluthafar Klakka í dag BNP Paribas, erlendur sjóður í stýringu fjárfestingafélagsins CarVal, og félög á vegum bræðranna Ágústs og Lýðs Guðmundssona og Sigurðar Valtýssonar, viðskiptafélaga þeirra og fyrrverandi forstjóra Exista.