Afkoma borgarinnar sjö milljarðar umfram áætlun

Rekstrarniðurstaða Reykjavíkurborgar í A- og B-hluta var jákvæð um 20,6 milljarða króna en áætlanir höfðu gert ráð fyrir jákvæðri niðurstöðu um tæplega 12,7 milljarða króna. Árshlutareikningur borgarinnar fyrir tímabilið janúar til september 2017 var afgreiddur í borgarráði í gær.

Helstu ástæður fyrir betri afkomu má rekja til hærri tekjufærðra matsbreytinga fjárfestingaeigna Félagsbústaða hf. og lægri fjármagnsgjalda samstæðunnar vegna gangvirðisbreytinga innbyggðra afleiða í raforkusamningum hjá Orkuveitu.

Rekstrarniðurstaða fyrir fjármagnsliði var jákvæð um rúmlega 18 milljarða króna sem er tæplega 2,3 milljörðum betri niðurstaða en áætlun gerði ráð fyrir.

Eiginfjárhlutfall hækkar lítillega

Heildareignir samstæðunnar samkvæmt samanteknum efnahagsreikningi námu í árslok rúmlega 570 milljörðum króna, heildarskuldir ásamt skuldbindingum voru rúmlega 300 milljarðar og eigið fé var 264 milljaðar tæpir en þar af var hlutdeild meðeigenda 14,5 milljarðar tæpir. Eiginfjárhlutfall samstæðunnar fer hækkandi og er nú 46,3 prósent en var 45,8 prósent um síðustu áramót.

Til A-hluta Reykjavíkurborgar telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, sem heldur utan um rekstur fagsviða, Eignasjóð og Bílastæðasjóð.

Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu borgarinnar, en rekstur þeirra er að stofni til fjármagnaður með þjónustutekjum. Fyrirtækin eru:  Orkuveita Reykjavíkur, Faxaflóahafnir sf., Félagsbústaðir hf., Íþrótta- og sýningahöllin hf., Malbikunarstöðin Höfði hf., Slökkvilið höfuðborgar­svæðisins bs., Sorpa bs. og Strætó bs, auk Aflvaka hf og Jörundar ehf.