Ætla að draga úr kolefnisspori Íslands með endurvinnslu á timbri

Elkem Ísland og Sorpa hafa gert með sér formlegan samstarfssamning um að Elkem Ísland á Grundartanga taki við timbri sem fellur til hjá Sorpu og nýti sem hráefni inn á ljósbogaofna fyrirtækisins. Timbrið er kurlað og er notað til að draga úr notkun óendurnýjanlegra kolefnisgjafa við vinnslu kísilmálms. Samkvæmt tilkynningu frá Sorpu er um að ræða um 8.000 tonn af timbri sem fellur til hjá fyrirtækjum og einstaklingum á hverju ári og má því telja verkefnið eitt af stærri endurvinnsluverkefnum landsins.

„Timbur er kolefnishlutlaust og notkun þess dregur þar með úr kolefnisspori fyrirtækisins um 14.000 tonn af koldíoxíði á ári. Þá má gera ráð fyrir að það að forða timbrinu frá urðun spari útblástur sem samsvarar yfir 4.000 tonnum af koldíoxíði á ári. Samanlagður ávinningur jafngildir því að leggja um 6.800 bílum.“

Timbur er yfirleitt nýtt sem orkugjafi erlendis en virkjun endurnýjanlegra orkuauðlinda, og þar með vistvænni orkuframleiðsla hérlendis, gerir það að verkum að timbrið nýtist betur á þennan hátt.