Él og slydda í kortunum þessa vikuna

Búast má við kólnandi veðri í vikunni. Í dag er róleg suðlæg eða breytileg átt í vændum með dálítilli rigningu, en það ætti að hanga þurrt norðaustantil samkvæmt hugleiðingum veðurfræðings hjá Veðurstofu Íslands. Það er milt loft yfir landinu og hitinn þokkalegur miðað við árstíma, eða 5 til 10 stig. Haustveður á Íslandi gerist varla mikið meinlausara en í dag. 

Á morgun bætir í vind og vætu á vestanverðu landinu, suðvestan 8-13 m/s þar síðdegis og samfelld rigning. Áfram hægari vindur og þurrara austanlands.  Annað kvöld snýst í strekkings norðanátt á Vestfjörðum og víðar um land aðfaranótt miðvikudags.

Það kólnar með norðanáttinni og aðfaranótt miðvikudags og framan af degi má búast við slyddu eða snjókomu á öllu norðanverðu landinu, þó væntanlega hangi hann lengst af í rigningu alveg niður við sjávarmál. Um skammvinna norðanátt er að ræða, því síðdegis á miðvikudag lægir og léttir til og verður þá fróðlegt að sjá að hversu miklu leyti jörð verður orðin grá eða hvít á Norður- og Austurlandi eftir þetta sýnishorn af norðanátt.

Veðurhorfur á landinu næstu daga

Á þriðjudag:

Suðvestan 5-13 m/s og rigning með köflum, en léttir til austanlands. Hiti 5 til 10 stig. Norðlægari um kvöldið með slyddu um landið norðvestanvert og kólnandi veðri. 

Á miðvikudag:

Norðan 8-13 m/s framan af degi, en 13-18 austast á landinu. Él um landið norðanvert, en bjartviðri sunnantil. Lægir og styttir upp síðdegis. Hiti 1 til 5 stig við S- og V-ströndina, annars hiti um frostmark. Hægt vaxandi sunnanátt um kvöldið. 

Á fimmtudag:

Suðvestan 8-15 og rigning eða jafnvel slydda, en úrkomulítið austanlands. Hiti 2 til 8 stig. 

Á föstudag:

Norðan 5-10 og él við norðurströndina. Hæg breytileg átt í öðrum landshlugum og stöku skúrir eða slydduél. Hiti nálægt frostmarki. 

Á laugardag: 

Norðanátt og dálítil él norðantil, en léttskýjað syðra. Víða vægt frost. 

Á sunnudag:

Líkur á að gangi í hvassa suðaustanátt með rigningu eða slyddu og hlýnandi veðri.