Náðu líklega að bjarga fæti Miller | Mynd

Ein viðbjóðslegustu meiðsli sem hafa sést lengi í NFL-deildinni komu á sunnudag er Zach Miller, leikmaður Chicago Bears, meiddist illa.

Miller var þá að grípa boltann í endamarkinu en snéri hrikalega upp á hnéð á sér er hann lenti í endamarkinu.

Svo alvarleg voru meiðslin að það varð að rjúka með Miller á spítala og gera neyðaraðgerð í von um að bjarga fætinum. Slagæð fór í sundur og það gæti endað svo að Miller missi fótinn eftir allt saman.

„Hann er ekki alveg sloppinn en þó í eins góðum málum og hægt er núna,“ sagði John Fox, þjálfari Bears, en það þurfti að kalla til sérfræðilækna í þessa stóru og erfiðu aðgerð sem sögð er hafa heppnast vel.

Hér að neðan má sjá hvernig hnéð á Miller fór en það verður að teljast kraftaverk ef hann spilar aftur í NFL-deildinni.