Stjórn Fáfnis Offshore hefur afskrifað 1.134 milljóna króna fjárfestingu í hálfkaraða olíuþjónustuskipinu Fáfni Viking sem aldrei verður afhent. Fyrirtækið, sem er að stórum hluta í eigu íslenskra lífeyrissjóða, var rekið með 244 milljóna króna tapi í fyrra en tekjur þess jukust um 27 prósent milli ára og námu 626 milljónum.

Norska skipasmíðastöðin Hav­yard AS rifti í ársbyrjun samningi frá mars 2014 við Fáfni Offshore, sem rekur sérútbúna olíuþjónustuskipið Polarsyssel, um smíði Fáfnis Viking sem var þá metið á um fimm milljarða króna. Afhendingu þess hafði þá verið seinkað tvívegis sökum verkefnaskorts hjá íslenska fyrirtækinu sem rekja mátti til mikillar lækkunar olíuverðs. Smíði skipsins var síðar færð í dótturfélag Fáfnis Offshore, einkahlutafélagið Polar Maritime, að kröfu sýslumannsembættisins á Svalbarða sem hefur leigt Polarsyssel í níu mánuði á ári og þannig skapað eina verkefni Fáfnis.

Samkvæmt nýjum ársreikningi fyrirtækisins fyrir 2016, sem Fréttablaðið hefur undir höndum, greiddi Fáfnir jafnvirði 169 milljóna króna til Havyard þegar afhendingu skipsins var frestað í annað sinn og smíðin færð í dótturfélagið. Þar heitir skipið ekki lengur Fáfnir Viking heldur Hull 126 eða Skipsskrokkur 126. Hafði fyrirtækið áður greitt Havyard 965 milljónir króna. Norska skipasmíðastöðin yfirtók Fáfni Viking þegar samningnum var rift 2. janúar síðastliðinn.

Polarsyssel var í árslok 2016 metið á 278 milljónir norskra króna eða 3,7 milljarða króna. Það hefur fallið í virði um 64 milljónir norskra króna í bókum Fáfnis á tveimur árum eða um 850 milljónir króna.

Fáfnir Offshore var stofnað 2012 af Steingrími Erlingssyni, fyrrverandi forstjóra félagsins. Framtakssjóðurinn Akur, sem er í eigu þrettán lífeyrissjóða, Íslandsbanka og VÍS, er stærsti eigandi félagsins með 35 prósent. Þar á eftir kemur annar framtakssjóður, Horn II, í eigu lífeyrissjóða, fjármálafyrirtækja og fagfjárfesta, með 24,3 prósent. Sjávarsýn, fjárfestingarfélag Bjarna Ármannssonar, fyrrverandi forstjóra Glitnis, á 11,5 prósent.

Félagið Haldleysi, sem hét áður Fáfnir Holding og var í eigu Steingríms, er skráð fyrir 10,5 prósentum en félagið var tekið til gjaldþrotaskipta í ágúst. Fréttablaðið greindi í júní síðastliðnum frá því að Steingrímur hefur stefnt Fáfni Offshore.

Krefst hann þess að fá greiddan sex mánaða uppsagnarfrest og orlof en honum var sagt upp störfum í desember 2015. Aðalmeðferð í málinu mun hefjast 1. desember næstkomandi. Stjórnendur Fáfnis telja hann ekki hafa staðið við skyldur sínar á uppsagnarfresti og hafa gert gagnkröfu.