ÁTVR keypti notaða Land Cruiser bifreið á 9,8 milljónir

Áfengis- og tóbaksverslun ríkisins keypti í sumar notaðan, sjö ára gamlan Toyota Land Cruiser-jeppa á 9,8 milljónir króna til að nota í starfsemi sinni. Jeppanum er ætlað að leysa af hólmi annan tíu ára gamlan Land Cruiser-jeppa fyrirtækisins.

Sigrún Ósk Sigurðardóttir, aðstoðarforstjóri ÁTVR, segir í svari við fyrirspurn Fréttablaðsins að jeppinn sé ekki hugsaður fyrir einhvern tiltekinn starfsmann fyrirtækisins. ÁTVR þurfi traustan og góðan bíl til að takast á við íslenska veturinn og sinna verkefnum víðs vegar um landið.

„ÁTVR rekur 50 Vínbúðir. Þar af eru 37 á landsbyggðinni og eru þær dreifðar um landið. Farið er í Vínbúðirnar reglulega allt árið um kring. Ferðirnar eru af ýmsum toga, t.d. vegna viðgerða og viðhalds, gæðaeftirlits, talninga, rekstrareftirlits og kennslu. Nauðsynlegt er að vera með traustan og góðan bíl við vetraraðstæður eins og þekkjast á Íslandi,“ segir Sigrún Ósk.

Gamla bílinn, 2007 árgerðina af Land Cruiser sem ekinn er 305 þúsund kílómetra, reyna Ríkiskaup nú að selja í gegnum uppboðsvef Króks. Á föstudag var komið hæsta boð upp á 2,6 milljónir króna í þann bíl og virðast Land Cruiser-jepparnir því halda sér vel í verði.

Í ljósi þess að nýi jeppinn, sem keyptur var í júní síðastliðnum, er aðeins þremur árum yngri en sá gamli, vekur hið háa kaupverð þó athygli. Að sögn Sigrúnar kostaði bíllinn 9.789.132 krónur og var keyptur í gegnum örútboð Ríkiskaupa líkt og venjan er við bifreiðakaup hins opinbera.

Til samanburðar hefur á undanförnum misserum nær allur ráðherrabílafloti landsins verið endurnýjaður fyrir tæpar 100 milljónir. Allir nema tveir ráðherrabílar velferðarráðuneytisins.

Í nóvember var keyptur splunkunýr Volvo XC90 T8 tengiltvinnjeppi fyrir ferðamála-, iðnaðar- og nýsköpunarráðherra á 9,4 milljónir. BMW X5 tengil­tvinnjeppi fyrir dómsmálaráðherra á rúmar 9 milljónir í maí 2016, Mercedes Benz E250 lúxusbifreið var keypt fyrir fjármála- og efnahagsráðherra í janúar 2015 á tæpar 9,6 milljónir. Allt nýir bílar en ódýrari en hinn 7 ára gamli jeppi ÁTVR.

Innanríkisráðuneytið festi í mars síðastliðnum einnig kaup á nýjum Toyota Land Cruiser 150 VX-jeppa fyrir samgönguráðherra. Hann kostaði, nýr úr kassanum, 10,7 milljónir.

Ekki er ólíklegt að nýi Land Cruis­er-jeppi ÁTVR sé vel útbúinn, en hann var keyptur nýr árið 2010 af útgerðarmanninum Magnúsi Kristinssyni, fyrrverandi eiganda Toyota-umboðsins á Íslandi, sem væntanlega hefur vandað valið.