Tölvutek og Símafélagið í samstarf

Tölvutek og Símafélagið hafa undirritað samning sem felur í sér að Tölvutek hefur nú sölu á internet- og símaþjónustu auk afhendingu og móttöku á búnaði frá Símafélaginu í verslunum sínum í Reykjavík og á Akureyri. Í tilkynningu segir að Tölvutek sé einn stærsti dreifingar- og söluaðili á tölvum og tölvubúnaði á Íslandi. Símafélagið sé alhliða fjarskiptafyrirtæki sem reki eigin fjarskiptakerfi og bjóði upp á millilandasambönd og mikla tækniþekkingu.

„Við höfum verið með net- og símaþjónustu frá Símafélaginu í fjölda ára og erum stoltir að geta núna aðstoðað bæði einstaklinga og fyrirtæki við að komast í þá góðu þjónustu sem þeir veita en Símafélagið býður upp á heildarpakka í hröðu interneti, GSM og heimasíma svo eitthvað sé nefnt. Einnig eru þeir þekktir fyrir að vera með einn besta svörunartíma á netinu sem hentar sérlega vel fyrir tölvuleikjaspilun og einnig aðra sem vilja hratt internet,“ segir Hafþór Helgason, framkvæmdastjóri Tölvutek, í tilkynningunni.

„Símafélagið er ört stækkandi og er því viðeigandi að auka við þjónustu með afhendingu á búnaði auk þess sem sérfræðingar Tölvutek geta leiðbeint einstaklingum og fyrirtækjum sem hafa hug á að stofna eða uppfæra net- eða símamálin sín,“ segir Brjánn Jónsson framkvæmdastjóri, Símafélagið.