„Ljóst að Ísland á mikið undir traustri stöðu stóru íslensku flugfélaganna tveggja“

Tvö flugfélög, það er íslensku flugfélögin Icelandair og WOW air, eru með langmestu markaðshlutdeildina þegar kemur að millilandaflugi hér á landi. Þetta kemur fram í ítarlegri efnahagslegri greiningu Landsbankans á ferðaþjónustunni hér á landi er þar er sérstaklega fjallað um flug og hvaða áhrif það hefur á ferðaþjónustuna sem orðin er undirstöðuatvinnugrein.

Í umfjöllun bankans kemur fram að uppgangur ferðaþjónustunnar á Íslandi skýrist af samspili ýmissa þátta en langmikilvægasti þátturinn sé stóraukið framboð af flugferðum hingað til lands.

Alls fljúga þrjátíu flugfélög hingað til lands á þessu ári. Það er því ljóst að margir eru um hituna en Icelandair og WOW air eru engu að síður með langmestu markaðshlutdeildina.

Easyjet kemst næst íslensku flugfélögunum

„Á tímabilinu febrúar til október 2017 voru félögin með tæplega 82% af sætaframboði í flugi til og frá landinu. Hlutdeildin í Ameríkufluginu er enn hærri eða yfir 90%. Það erlenda flugfélag sem kemst næst íslensku félögunum í markaðshlutdeild er Easyjet með tæplega 4% en alls 23 erlend félög skipta með sér um 18% markaðshlutdeild með tilliti til flugframboðs.

Í ljósi mikilvægis alþjóðaflugsins fyrir ferðaþjónustuna, og mikilvægis ferðaþjónustunnar fyrir hagkerfið, er ljóst að Ísland á mikið undir traustri stöðu stóru íslensku flugfélaganna tveggja,“ segir í greiningu bankans.

 

Flugfélögin mikilvæg fyrir efnahagslegan stöðugleika

Því er varpað upp hvort þetta þýði að flugfélögin séu orðin kerfislega mikilvægt fyrir efnahagslegan stöðugleika á Íslandi, svipað og stóru viðskiptabankarnir þrír eru skilgreindir sem kerfislega mikilvægir fyrir fjármálastöðugleika í landinu.

Samkvæmt greiningu Landsbankans er það augljóst að verulegar truflanir á starfsemi flugfélaganna eða brotthvarf annars þeirra, og hvað þá beggja, myndi hafa gríðarlega miklar afleiðingar fyrir íslenska ferðaþjónustu.

„Áhrifin yrðu einnig veruleg fyrir íslenskt efnahagskerfi í heild og almenning. Slíkt áfall hefði keðjuverkandi áhrif, m.a. á gengi krónunnar, eignaverð, vexti og verðbólgu. Ef flugfélögin eru talin kerfislega mikilvæg vakna spurningar um viðbúnað stjórnvalda og aðkomu þeirra að ferðaþjónustunni.

Þarf til dæmis að útbúa viðbragðsáætlanir sem hægt er að grípa til ef flugfélögin lenda í vanda? Erfiðleikar margra erlendra flugfélaga síðustu ár og misseri, samanber nýlegt dæmi um erfiðleika flugfélagsins Airberlin, vekja ugg í brjósti um hvað gæti gerst hér á landi ef annað hvort íslensku flugfélaganna lenti í svipuðum hremmingum,“ segir í greiningu Landsbankans.