Almenn samstaða um að hreinsa til á ströndinni

Að hreinsa fjörurnar við Breiðamerkursand er heljarinnar verkefni og við vonumst eftir góðri þátttöku almennings. Það er dagur íslenskrar náttúru og spáð er góðu veðri,“ segir Rósa Björk Halldórsdóttir, yfirlandvörður þess hluta Vatnajökulsþjóðgarðs sem bættist við hann í sumar þegar Breiðamerkursandur, Fjallsárlón og Jökulsárlón féllu inn í hann.

„Við landverðirnir hér fórum út á fjörur í júní á jeppa og fjórhjóli með okkar fáu hendur og tókum það sem við gátum. En komumst ekki yfir allt svæðið og höfðum ekki tæki til að losa þunga hluti.“

Nú er Rósa í hópi kvenna í héraðinu sem að hreinsuninni stendur í dag. Hún segir marga leggja því málefni lið. „Íslenska gámafélagið leggur til tæki, tól og mannafla í sjálfboðavinnu, kemur með gáma og flytur þá fram og til baka. Funi er annað fyrirtæki sem skaffar gáma.

Ferðaþjónustuaðilar ætla að koma á bílum og ferja fólk á milli svæða, einnig þurfum við dráttarvélar og vinnuvélar, því það er járnarusl á fjörunum og stórir hlutir fullir af sandi sem ekki er hægt að lyfta nema með vélum. Tómas Knútsson í Bláa hernum er frumkvöðull í að virkja fólk í hreinsun íslenskra stranda og hann hefur látið okkur í té poka og góð ráð. Svo ætlar Nettó að bjóða öllum í grillveislu við Hrollaugshóla sem eru við Fellsá, það er yndislegur staður í skjóli kletta og þar kemst fólk á salerni.“

Rósa býr á Hrollaugsstöðum í Suðursveit, ásamt öðrum landvörðum svæðisins. „Þar fer afskaplega vel um okkur,“ tekur hún fram og segir yndislegt að fá að taka að einhverju leyti þátt í þeirri uppbyggingu sem sé að hefjast við Jökulsárlón.

„Ég er bara með blað og blýant að skipuleggja sjálf og reyna að koma einhverjum böndum á bílastæðamál og utanvegaakstur. En það verður byrjað í haust á stjórnar- og verndunaráætlun sem er grunnplagg um verndun, vöktun og stjórn svæðisins.“