TM hagnast um 1,9 milljarða

Hagnaður TM á fyrri helming ársins nam 1.875 milljónum króna, samanborið við 1.174 milljónir króna á sama tímabili árið áður.

Fram kemur í tilkynningu að hagnaður TM á öðrum ársfjórðungi var 909 milljónir króna sem er ríflega 200 milljónum króna meiri hagnaður en kom fram í afkomuviðvörun félagsins þann 18. júlí síðastliðinn.

Betri afkoma skýrist einkum af hærri fjárfestingatekjum vegna endurmats á óskráðum hlutabréfum. Afkoma af fjárfestingastarfsemi var góð á fjórðungnum og skilaði 4,9 prósent ávöxtun. Afkoma vátryggingastarfseminnar valdi hins vegar vonbrigðum og muni þar mestu um óhagstæða þróun slysamála frá fyrri árum.

Á heildina litið hafi afkoma TM á öðrum ársfjórðungi verið góð og arðsemi eigin fjár há, eða 33 prósent á ársgrundvelli. Samhliða birtingu árshlutauppgjörs birtir félagið spá fyrir næstu fjóra ársfjórðunga og endurspeglar hún þá þróun sem er að eiga sér stað í tjónum fyrri ára. Í uppfærðri spá sé gert ráð fyrir að samsett hlutfall næstu 12 mánaða verði 97 prósent.

Tjónakostnaður á öðrum ársfjórðungi reyndist mun hærri en spár gerðu ráð fyrir segir í tilkynningu. Eigin tjón á fjórðungnum vaxi þannig um 41,5 prósent borið saman við sama tíma í fyrra en eigin iðgjöld hafa á sama tíma vaxið um 6,9 prósent.

Þróun eldri slysatjóna, einkum slysatryggingar sjómanna, vegi þyngst í óhagstæðri tjónaþróun en ökutækjatryggingar hafi einnig þróast með óhagstæðum hætti milli ára.

Samsett hlutfall TM á fyrri árshelmingi er 106 prósent og framlegð af vátryggingastarfsemi neikvæð um 435 milljónir króna. Sé litið til síðustu 12 mánaða er samsett hlutfall félagsins 101,5 prósent. Rekstrarkostnaður á fyrri helmingi ársins hækkar um 1,4 prósent milli ára og kostnaðarhlutfall félagsins síðastliðna 12 mánuði er 20,3 prósent, sem nálgast langtímamarkmið TM um að ná kostnaðarhlutfalli undir 20 prósent.