Innherjar selja bréf í bönkum

Bankastjórar og stjórnarmenn í stærstu bönkum Bandaríkjanna hafa selt hluta af bréfum sínum í bönkunum á þessu ári, samkvæmt nýrri greiningu Financial Times.

Greiningin leiddi í ljós að innherjar í sex stærstu bönkum landsins, JPMorgan Chase, Bank of America, Wells Fargo, Citigroup, Goldman Sachs og Morgan Stanley, hafa samanlagt selt 9,32 milljónir hlutabréfa í bönkunum það sem af er árinu. Söluandvirðið nemur hundruðum milljóna dala.

Þróunin er ólík því sem var í fyrra, en þá keyptu innherjarnir milljónir hlutabréfa í bönkunum. Eftir að hafa snarhækkað í kjölfar kosningasigurs Donalds Trumps í nóvember í fyrra hefur gengi hlutabréfa í bandarískum bönkum tekið að lækka undanfarna mánuði. Má rekja ástæðuna að hluta til efasemda fjárfesta um að ríkisstjórn Trumps takist að lækka skatta og draga úr reglubyrði atvinnulífsins, eins og hún hefur lofað.

Fréttin birtist fyrst í Fréttablaðinu