Útilokað að hægt sé að sleppa jafn miklu magni laxaseiða í sjó

Sérfræðingur hjá Matvælastofnun segir útilokað að hægt sé að sleppa jafn miklu magni laxaseiða í sjó án þess að upp um það komist líkt og gerðist í Gileyri við Tálknafjörð fyrir fimmtán árum. Eftirlit sé meira nú en þá.

Í fréttum Stöðvar tvö í gærkvöld var greint frá því að eitt hundrað og sextíu þúsund laxaseiðum af norskum stofni hafi verið sleppt í sjó við Gileyri á Tálknafirði árið 2002.

Málið á rætur sínar að rekja til þess að árið 2001 keypti félagið Eyrar-fiskeldi, í eigu útgerðarmannsins Níels Ársælssonar, um 160 þúsund laxaseiði af norskum stofni. Þau komu til eldishússins við Gileyri á Tálknafirði í september 2001 og áttu að fara í sjókvíar sumarið eftir.

Eftir að samstarfsaðili Eyrar varð gjaldþrota ákvað Níels að hleypa seiðunum 160 þúsund í sjó við Gileyri en líkt og fréttastofa hefur fjallaði nýverið um gefa bráðabirgðaniðurstöður rannsóknar Hafró skýr merki um erfðablöndun í tveimur laxastofnun í Botnsá og Sunnudalsá en báðar árnar eru á svæðinu.

Matvælastofnun sér um opinbert eftirlit með fiskeldi og sjávarafurðum en sá ekki um slíkt eftirlit þegar umræddum seiðum var sleppt fyrir fimmtán árum. Árið 2006 var sett löggjöf sem herti mjög á skráningu er varðar rekjanleika seiða og Dóra Gunnarsdóttir, forstöðumaður neytendaverndar hjá Matvælastofnun segir að mál sem þetta ætti ekki að geta komið upp í dag.

Spjall Ásgeirs Erlendssonar og Dóru má heyra hér að neðan.