Hagar ekki eins spennandi án Lyfju

Snorri Jakobsson, greinandi hjá Capacent, segir ljóst að eftir ákvörðun Samkeppniseftirlitsins um að ógilda kaup smásölurisans Haga á Lyfju séu Hagar ekki eins spennandi fjárfestingarkostur og áður. Sameining félaganna hefði aukið breidd í rekstri Haga auk þess sem vænt samlegðaráhrif hefðu verið umtalsverð.

Hann segir að Capacent verðmeti Haga án Lyfju og Olís á genginu 48,6 krónur á hlut en verðmatsgengi Haga með fyrirtækin tvö innanborðs hafi verið 52,4 krónur á hlut. Gengi bréfa félagsins stóð í 39,05 krónum á hlut eftir lokun markaða í gær.

Þrátt fyrir að Samkeppniseftirlitið hafi ekki samþykkt kaupin segir Snorri hins vegar að Hagar sé enn verulega vanmetið fyrirtæki á markaði. „Við erum hins vegar ekkert að draga fjöður yfir það að Hagar eru ekki eins spennandi fjárfestingarkostur og áður, en Lyfja félli vel að rekstri Haga,“ segir hann.