Veiðisvæðið sem er kennt við Nes í Laxá í Aðaldal er líklega það svæði sem gefur flesta laxa á hverju sumri yfir 100 sm og það er lítil breyting þar á í sumar.
Í fyrradag var landað laxi úr Vitaðsgjafa sem er sá stærsti sem við vitum af í sumar, ekki bara sá stærsti af Nessvæðinu heldur sá stærsti á landinu í sumar. Það var Stefán Stefánsson sem landaði þessum laxi á Sunray og eins og meðfylgjandi mynd ber með sér er þetta þykkur og vel haldinn stórlax af þessu rómaða svæði.
Þar með bætist í 20 punda klúbbinn á Nesi en í viðurkenningarskyni eru veiðimenn sæmdir orðum við inntöku í þennan skemmtilega klúbb. Það ber annars mikið á stórum löxum á svæðinu og nokkrir laxar hafa þegar sýnt sig sem fullyrt er að sæki vel á þennan 109 sm en það verður þó ekki úr því skorið fyrr en þessir höfðingjar taka fluguna og verða rétt mældir við bakkann. Besti tíminn fyrir stóru hængana er yfirleitt á haustinn og það verður þess vegna spennandi að sjá hvort einhver stærri lax en þessi verði dreginn í háfinn í Nesi í sumar.
