Olíumengun enn til staðar í Grafarlæk og Grafarvogi

Olíumengun er nú sjáanleg í neðanverðum Grafarlæk sem liggur út í Grafarvog og má sjá brák í fjörum Grafarvogs meðfram norðurströndinni. Nokkur sjón-og lyktarmengun er á svæðinu en það er metið svo að fólki stafi ekki hætta af menguninni.

Ekki hefur enn tekist að finna út hvaðan mengunin kemur en starfsmenn Veitna ohf. vinna ötullega að því að rekja upptökin. Slökkviliðið metur það svo að ekki sé um mikla olíumengun að ræða.

Vitað er að olíumengun berst í Grafarlæk úr regnvatnsrás og við úrkomuna eykst flæðið gegnum rásina. Þess vegna er talað um aukningu á sýnilegri mengun. Talið er líklegt að olían skolist nú út af meiri hraða en áður. Í tilkynningu frá Reykjavíkurborg segir að ekki sé hægt að útiloka að enn komi mengun frá uppsprettu en hitt er talið líklegra að um útskolun eldri mengunar frá því á föstudag og laugardag sé að ræða.

Eins og áður kom fram hefur enn ekki tekist að rekja hvaðan mengunin kemur en einn möguleiki er sá að mengunin sé vegna bilaðrar olíuskilju eða rangra tenginga. Aðilar sem meðhöndla olíu og eru búsettir í Grafarholti og hluta Hálsahverfis eru vinsamlegast beðnir um að athuga hvort olíuskiljur séu ekki í lagi eða hvort mögulegt sé að olíumengun sé að berast með einhverju móti í niðurföll.

Grafarvogur er mikilvægt náttúrusvæði með auðugt fuglalíf. Starfsmenn skrifstofu umhverfisgæða hafa gengið fjörurnar í Grafarvogi og lagt mat á útbreiðslu og þykkt olíunnar. Þeir komust að því að greinileg svört skán sé á grösugum fitjum norðarlega í voginum og auk þess á þangi og grjóti. Starfsmennirnir hafa ekki séð til fugla sem hafa orðið fyrir olíumenguninni en áfram verður fylgst með áhrifum mengunarinnar á fuglalíf. 

Vegfarendur eru beðnir um að hafa samband við starfsfólk skrifstofu hjá umhverfis-og skipulagssviði Reykjavíkurborgar ef þeir verða varir við fugla sem virðist illa haldnir vegna olíumengunarinnar.