Fín veiði í Úlfljótsvatni

Úlfljótsvatn kemur inn á svipuðum tíma og Þingvallavatn en er af einhverjum sökum mun minna stundað.

Veiðin þar er nefnilega oft ansi góð þegar aðstæður eru réttar eins og á við í öllum vötnum en það virðist vera nóg af bleikju í vatninu.  Þarna má líka setja í væna urriða sem komast kannski ekki alveg í stærðina sem við þekkjum af þeim stærstu í Þingvallavatni en sumir þeirra eru ekkert langt frá því.  Á hverju sumri veiðast urriðar í vatninu sem eru 10-14 pund en það er eins og með urriðann í Þingvallavatni, hann virðist taka best fyrst á vorinn.

Bleikjuveiðin hefur verið fín hjá þeim sem hafa lagt leið sína í Úlfljótsvatn síðustu daga og bleikjan sem veiðist í vatninu er feit og falleg.  Mesta veiðin virðist vera á vesturbakkanum en hann er líka mun meira stundaður.  Það eru engu að síður yfirleitt ekki margir að veiða í þessu annars skemmtilega vatni og við hvetjum þá sem búa í nágrenni þess að gefa því gaum á góðum degi.  Morgnar og kvöld gefa best eins og oft vill vera með silungsvötn.