Ná samkomulagi um byggingu höfuðstöðva Fram í Úlfarsárdal

Knattspyrnufélagið Fram og Reykjavíkurborg hafa náð samkomulagi um uppbyggingu íþróttamannvirkja í Úlfarsárdal. Með samkomulaginu flytur Fram höfuðstöðvar sínar í Úlfarsárdal. Þetta kemur fram í fréttatilkynningu frá knattspyrnufélaginu.

Samningar milli Fram og Reykjavíkurborgar hafa nú loksins náðst en ferlið hefur staðið yfir síðan árið 2004. Deilumál snerust að mestu um að hverfið, sem upphaflega átti að vera 25 þúsund manna hverfi, var skorið niður í um 9500 manna hverfi. Aðstaða félagsins hafi því verið takmörkuð verulega frá fyrstu samningum.

Í lausn viðræðna felst m.a. að í Úlfarsárdal verður byggt fjölnota íþróttahús með áhorfendaaðstöðu, þar sem rúmast tveir handknattleiksvellir í fullri stærð, áhorfendaaðstaða fyrir aðalleikvang í knattspyrnu, félags- og þjónusuaðstaða, aðalleikvangur Fram með gervigrasi, upphitun og áhorfendastúku með þaki og grasæfingavellir.

Í fréttatilkynningunni segir að álíka aðstaða verði aldrei möguleg í Safamýri, þar sem félagið er nú með höfuðstöðvar. Fram hefur miklar væntingar til þess að staðið verði við gerða samninga þannig að íbúar hverfisins, iðkendur og Knattspyrnufélagið Fram geti starfað saman af krafti.

„Þetta hefur tekið miklu lengri tíma en við hefðum viljað, en FRAM varð að standa í lappirnar til að ná fram þeirri aðstöðu sem íbúar hverfisins og félagið eiga skilið. Loks er komin niðurstaða í þetta umdeilda og flókna mál og nú getum við hafist handa við að horfa til framtíðar,“ segir Guðmundur B. Ólafsson, formaður samninganefndar.

Uppbygging mannvirkjanna í Úlfarsárdal hefst nú þegar og verður að fullu lokið árið 2021.