Óttast sameiningu MR og Kvennaskóla

„Þetta er þvílík vanvirðing gagnvart 900 manna stofnun að það er alveg með ólíkindum,“ segir Linda Rós Michaelsdóttir, kennari í MR sem starfaði jafnframt sem rektor skólans og konrektor um tíma.

Linda gagnrýnir harðlega að menntamálaráðuneytið hafi enn ekki auglýst starf rektors MR, þótt meira en mánuður sé liðinn frá því að Yngi Pétursson, fráfarandi rektor, sagðist mundu láta af starfinu. Linda Rós segist hafa fengið þó nokkuð af hringingum frá nemendum og foreldrum sem vilji vita hver muni stýra skólastarfinu í MR.

„Ég bara hefði gaman af að vita hvaða svar ráðherra hefur við því hvaða tilgangur er með því að halda fólki í óvissu,“ segir Linda og bætir við að seinagangurinn komi niður á velferð nemenda.

„Mig grunar að það sé verið að gera enn eina tilraunina til að sameina skólana og gera stóran skóla,“ segir Linda Rós. Það yrði þá hugsanlega sameining Menntaskólans í Reykjavík og Kvennaskólans í Reykjavík. Það yrði „enn eitt stórslysið“ í menntakerfinu.

Fréttablaðið spurði menntamálaráðuneytið í síðustu viku hvers vegna staða rektors í MR hefði ekki verið auglýst. Ráðuneytið segir málið í vinnslu þar og óljóst hvenær auglýst verður. Ef ekki verði búið að skipa nýjan skólameistara fyrir haustið þá gegni einhver annar starfinu fyrir hann, til dæmis aðstoðarskólameistari, þar til nýr verður ráðinn. Skólasetning verður 17. ágúst næstkomandi.

Fyrirhuguð sameining Fjölbrautaskólans við Ármúla og Tækniskólans hefur sætt mikilli gagnrýni starfsmanna fyrrnefnds skóla. Engar upplýsingar fengust um framvindu sameiningarinnar þegar Fréttablaðið spurði eftir þeim í gær.

Linda Rós gagnrýnir framkomu ráðuneytisins gagnvart starfsfólki og nemendum FÁ.

„Skólinn er með mjög blandað kerfi og marga nemendur sem þola illa óvissu. Svo er náttúrlega kennarastéttin og starfsfólk fyrir utan kennara. Það er komið núna að mánaðamótum júní og júlí og þau vita ekkert hvað verður,“ segir Linda Rós.