Viðskipti innlent

Ferðamönnum fækkar mikið á Vestfjörðum

Benedikt Bóas skrifar
Miðbær Ísafjarðarbæjar, stærsta þéttbýliskjarna Vestfjarða.
Miðbær Ísafjarðarbæjar, stærsta þéttbýliskjarna Vestfjarða. vísir/pjetur
„Mér finnst Skandinavía vera horfin. Það var mjög vel bókað í kringum áramótin en þegar hamborgarinn er kominn í um 25 evrur þá sér maður nánast bókanir hverfa af bókunarsíðunum. Þetta er í kringum 35-40 prósenta fækkun á gestum,“ segir Árni Sigurpálsson, hótelstjóri á hinu sögufræga Hótel Bjarkalundi.

Júnímánuður hefur farið illa af stað fyrir ferðaþjónustufyrirtæki á Vestfjörðum og er mikið um afbókanir. Munurinn á júní á milli ára er mikill. Hrannar Pétursson sem á sæti í stjórn Íslandsstofu, benti á þetta í þætti á Hringbraut. Birna Mjöll Atladóttir, hótelstjóri á Hótel Breiðavík, tekur undir að gestum hafi fækkað sem og Soffía Haraldsdóttir, eigandi Hótels Flókalundar. Þær voru ekki búnar að reikna nákvæma tölu.

„Ég held að þetta sé gengið, lengi vel hélt ég að þetta væri vegna Baldurs og vildi trúa því en það getur ekki útskýrt allt. Júní hefur verið mjög dapur en það glæðist nú eftir helgi,“ segir Birna en hún er með þremur færri stöðugildi í ár en á sama tíma í fyrra. Árni hefur þegar sagt upp fólki. „Það er ekkert að gera. Ég hef talað við marga víða um land og það er sama sagan. Það hefur alveg komið upp í kollinn að skella bara í lás. Ef þetta lagast ekki þá er enginn rekstrargrundvöllur. Þá á maður ekki fyrir mánaðarlaunum,“ segir Árni sem tók við rekstrinum á hótelinu árið 2005.

Íslendingar þekkja hótelið hans vel úr Vaktaseríunni. „Vorið er búið að vera kalt en þetta er áhyggjuefni því gengið er svo kolruglað. Ég tengi þessa fækkun bara genginu.

Ég hef aldrei þurft að segja upp fólki í júní og mér líst ekkert á framhaldið. Kannski lagast þetta, sumarið er jú að byrja, en miðað við í fyrra er þetta mikil fækkun,“ segir hann.

Soffía Haraldsdóttir hjá Hótel Flókalundi bendir á að fólk sem hafi bókað í gegnum bókunarvefi sé duglegast að afbóka. „Það sér að þetta kostar mikið. Fólk er ekki viljugt til að stoppa lengur því það er ekki til í að borga tugi evra fyrir mat. Það er hægt að fara með alla fjölskylduna út að borða fyrir 30 evrur í útlöndum. Ísskápsseglar sem kosta eina evru í Evrópu kosta 15-20 evrur hér á Íslandi. Útlendingar skila honum bara aftur þegar þeir sjá verðið.“

Hún segir að umferðin sé mikil en fólk ferðist saman og sé með innkaupapokana úr Bónus. „Það kemur ekki inn nema til að kaupa sér kaffibolla. Það er mikið af húsbílum núna á vegunum. Asíubúar eru mikið á húsbílum, stundum 7-8 saman og eru ekki til í að borga fyrir tjaldstæðisnóttina. Þegar maður bankar á gluggann þá fara þau bara burt.

Ég held að við séum með fullt af fólki sem er komið til landsins sem er ekki til í að borga neitt fyrir það.“


Tengdar fréttir

Airbnb-leiga í Reykjavík eykst um níutíu prósent á milli ára

Sérfræðingur um áhrif Airbnb á borgir segir að stjórnvöld verði að koma böndum á Airbnb-leigu í Reykjavík til að ráða við húsnæðismarkaðinn og offjölgun ferðamanna. Airbnb-leiga í Reykjavík hefur aukist um níutíu prósent á milli ára og um sextíu prósent íslenskra gestgjafa eru með fleiri en tvær eignir í útleigu.

Ísland líklega dýrasta land í heimi

Ísland er sennilega orðið dýrasta land í heimi sökum mikillar styrkingar krónunnar og er hið svokallaða bjórgengi hennar sérstaklega hátt.






Fleiri fréttir

Sjá meira


×