FME skoðar bónusa sem Borgun greiddi út

Fjármálaeftirlitið (FME) skoðar nú hvort Borgun hafi farið á svig við lög í september í fyrra þegar allir starfsmenn greiðslukortafyrirtækisins fengu 900 þúsund króna launauppbót hver. Forstjóri Borgunar segir að svo virðist sem FME telji greiðslurnar brjóta gegn reglum stofnunarinnar um kaupaukakerfi en óljóst sé gegn hvaða ákvæði þeirra fyrirtækið eigi að hafa brotið. 

„Þetta var eingreiðsla hjá okkur sem við borguðum í september og töldum okkur hafa rétt til þess. Enda væri þetta eins og aðrar eingreiðslur líkt og til dæmis jólabónusar. Þetta mál er í ferli hjá FME og við bíðum niðurstöðu þeirra,“ segir Haukur Oddsson, forstjóri Borgunar.

Stjórn Borgunar samþykkti í september í fyrra að greiða öllum starfsmönnum fyrirtækisins launauppbótina. Þannig fengju þeir að njóta „þess vaxtar og viðgangs sem orðið hefur í rekstri fyrirtækisins síðustu misseri, sem er ekki síst mikilli og góðri vinnu starfsfólksins að þakka“. FME skoðar nú hvort lagaskilyrði til greiðslnanna teljist uppfyllt og hefur gefið Borgun tækifæri til að koma fram með frekari sjónarmið. Meint brot varðar viðurlögum í formi sektargreiðslna en ekkert liggur fyrir um möguleg fjárhagsleg áhrif á rekstur greiðslukortafyrirtækisins. Þar störfuðu 140 manns í árslok 2016 og nam heildargreiðslan í september því 126 milljónum króna.

„Þetta verður túlkunaratriði og  við vitum ekki hver niðurstaðan verður. En við skoðuðum lögin og reglurnar áður en þetta var greitt út og töldum eingreiðsluna ekki falla undir ákvæði þeirra,“ segir Haukur.

Reglur FME um kaupaukakerfi byggja á lögum um fjármálafyrirtæki sem var breytt árið 2015. Með breytingunum var meðal annars kveðið á um að kaupaukar til starfsmanna megi ekki vera hærri á ársgrundvelli en sem nemur þrennum mánaðarlaunum. Einnig væri óheimilt að veita stjórnarmönnum og starfsmönnum sem starfa við áhættustýringu, innri endurskoðun eða regluvörslu kaupauka. Þá skuli fresta útgreiðslu að minnsta kosti 40 prósenta af ákvörðuðum kaupauka í að minnsta kosti þrjú ár.

Íslandsbanki er stærsti eigandi Borgunar, með 63,5 prósenta hlut, en bankinn er alfarið í eigu íslenska ríkisins. Þau svör fengust frá FME að stofnunin tjái sig ekki um einstök mál.