Ríkið á óbeinan eignarhlut í Marel upp á 24 milljarða

Óbeinn eignarhlutur Landsbankans og Lindarhvols, eignarhaldsfélags sem heldur utan um stöðugleikaeignir sem voru framseldar til ríkisins, í Marel í gegnum Eyri Invest er metinn samanlagt á ríflega 24 milljarða króna en hlutabréfaverð fyrirtækisins hefur hækkað um 51 prósent frá áramótum. Marel er langsamlega stærsta félagið í Kauphöllinni og nemur markaðsvirði þess um 268 milljörðum.

Landsbankinn, sem er nánast alfarið í eigu íslenska ríkisins, fer með yfir 23 prósenta eignarhlut í Eyri Invest en fjárfestingafélagið er stærsti einstaki hluthafi Marels með 27,24 prósent. Þá á félagið einnig um þriðjungshlut í Eyri Sprotum sem fjárfestir í nýsköpunarfyrirtækjum.

Í byrjun maí í fyrra setti Landsbankinn allan hlut sinn í Eyri Invest í opið söluferli. Fimm tilboð bárust í hlut bankans í félaginu og var þeim öllum hafnað. Á þeim tíma var óbeinn hlutur bankans í Marel metinn á tæplega 12 milljarða miðað við þáverandi gengi bréfa félagsins. Sá hlutur hefur hins vegar hækkað í virði um meira en fimm milljarða á um einu ári og er markaðsverðmæti hans í dag um 17 milljarðar.

Eignarhaldsfélagið Lindarhvoll á tíu prósenta hlut í Eyri Invest en bréfin í fjárfestingafélaginu voru á meðal þeirra eigna sem slita­bú gamla Landsbankans (LBI) framseldi til íslenskra stjórnvalda í tengslum við samþykkt nauðasamninga í árslok 2015. Lindarhvoll hefur enn ekki selt neitt af hlut sínum í Eyri Invest og er óbeinn eignarhlutur félagsins í Marel metinn á um 7,3 milljarða.

Rekstur Marels hefur gengið afar vel á undanförnum misserum og var 2016 besta ár fyrirtækisins frá upphafi. Hagnaður nam 76 milljónum evra og jókst um þriðjung frá fyrra ári. Þá voru heildartekjur 983 milljónir evra og hækkuðu um meira en 160 milljónir evra á árinu.

Fyrsti ársfjórðungur fór einnig vel af stað og skilaði Marel hagnaði upp á 21,3 milljónir evra sem er um 50 prósenta aukning frá sama tímabili í fyrra. Í febrúar síðastliðnum var tilkynnt að Eyrir Invest hefði selt rúmlega tveggja prósenta hlut í Marel til MSD Partners og nam kaupverðið um 4,3 milljörðum. 

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.