Telja nokkrum vopnum hafa verið beitt við að myrða fjölskylduna

Móðir og börn hennar voru meðal þeirra sem myrt voru með hrottalegum hætti í íbúð í Brønshøj í Kaupmannahöfn í morgun. Lögregla telur að morðinginn hafi beitt nokkrum vopnum.

Greint hefur verið frá því að hryllileg sýn hafi beðið lögreglumanna sem komu á vettvang fyrst í morgun þegar þeir sinntu útkalli vegna heimiliserja. Lögregla hefur sagt að mikið blóð hafi verið á vettvangi sem og merki um átök.

Ekstrabladet telur sig hafa heimildir fyrir því að fjölskylda hafi verið myrt í íbúðinni, móðir og nokkur börn hennar en lögregla hefur ekki viljað staðfesta fjölda þeirra sem fundust látnir í íbúðinni.

Lögregla hefur unnið að rannsókn á vettvangi frá því morgun og segir einn lögreglumaður að margt bendi til þess að morðinginn hafi beitt nokkrum vopnum. Þá hefur lögregla staðfest að bráðaliðar hafi reynt endurlífgun á einu fórnarlambinu án árangurs.

Einn maður hefur verið handtekinn í tengslum við málið. Óljóst er hvernig hann tengist fjölskyldunni en það eina sem lögrega hefur gefið uppi er að hann sé „tengdur heimilisfanginu“.