Sælkerabúlla með fisk væntanleg í Vesturbæinn

Ferðaþjónustufyrirtækið Fisherman  á Suðureyri er um þessar mundir að færa út kvíarnar með opnun sælkerabúllu með fisk í Vesturbænum. 

Sælkerabúllan verður til húsa í verslunarkjarnanum á Hagamel þar sem Ísbúð Vesturbæjar og Blómagalleríið er meðal annars að finna. Lengi vel var bókaverslun rekin í rýminu sem staðið hefur autt í á annað ár.

Fisherman var stofnað á Suðureyri árið 2000 og hefur hefur sérhæft sig í móttöku ferðamanna undanfarin ár með áherslu á daglega lífið í litlu sjávraþorpi úti á landi. Fisherman rekur hótel á Suðureyri, sjávarréttaveitingahús og kaffihús þar sem fiskur er allstaðar aðalsmerkið. Undanfarin ár hafa þúsundir gesta tekið þátt í sælkeraferðum um lítið sjávarþorp sem fyrirtækið bíður uppá segir Elías Guðmundsson, framkvæmdastjóri Fisherman.

„Hér á Suðureyri snýst allt um fisk og okkur langar að hvetja til meiri fiskneyslu hjá þjóðinni með því að auðvelda aðgengið að flottum vörum tengt fiski. Allt er að þróast í þá átt að fólk hefur lítinn tíma og við ætlum að aðstoða fólk við að upplifa einfalda og holla fiskrétti,“  segir Elías.

„Við höfum gert samning við Hagkaup um heildstæða vörulínu sem kemur í  þeirra verslanir í byrjun júní. Við vorum að leita að húsnæði til að pakka og þjónusta Hagkaup daglega með ferskar vörur og duttum þá niður á virkilega skemmtilegt húsnæði við Hagamel 67.“

Elías segir að húsnæðið henti mjög vel.

„Við sáum strax að þar væri lítið mál að bæta við eigin verslun með einfalda og skemmtilega fiskrétti. Þar stefnum við á að bjóða upp á þekkta smárétti úr „world culinary„ tengt fiski. Bláskel, fiskisúpur, tacos, rækjur, próteinrík snakkbox með fiski, tilbúna rétti til að borða á staðnum eða til að taka með heim og fleira skemmtilegt til að grípa með sér á hraðferð.“

Fisherman hefur í vetur fengið tvær viðurkenningar fyrir vöruþróun tengt þessu verkefni. Þar má nefna viðurkenningu Fjöreggs MNÍ fyrir lofsvert framtak á sviði matvæla og næringar og viðurkenning frá FÍT fyrir umbúðarhönnun en allar umbúðir fyrirtækisins eru umhverfisvænar í takt við tíðarandann í dag að sögn Elíasar.

Stefnt er að opnun búllunnar í byrjun júní.