Lagði LÍN og er ekki í ábyrgð fyrir fjörutíu ára gömlu námsláni

Málskotsnefnd Lánasjóðs íslenskra námsmanna (LÍN) hefur úrskurðað að Kristján Ari Arason geti ekki talist í ábyrgð fyrir fyrir tæplega fjörutíu ára gömlu námsláni sem kunningi hans tók og Kristján var í ábyrgð fyrir. Ábyrgðin féll niður vegna lagabreytinga árið 1992.

Fyrir rúmu ári síðan fékk Kristján Ari tilkynningu frá LÍN þar sem honum var gert kunnugt um að námslán sem hann var í ábyrgð fyrir hafi verið gjaldfelld vegna þess að lántakinn hafi orðið gjaldþrota. Ekkert hafði verið greitt inn á lánin og var Kristján krafinn um einnar milljón króna greiðslu innan tveggja vikna.

Þegar Kristján fór að kanna málið kom í ljós að árið 1992 var lögum um LÍN breytt þannig að námslán sem maðurinn hafði tekið síðar á lífsleiðinni voru sett í forgang varðandi endurgreiðslu. Hafði hann því greitt samviskusamlega inn á nýrri lánin en eldri lánin voru látin mæta afgangi. Þessu mótmælti Kristján Ari.

„Það er þvert á ábyrgðarskilmálana sem við skrifuðum undir. Þar stóð skýrum stöfum að endurgreiðslur skyldi hefjast þremur árum eftir námslok en það var ekki gert,“ segir Kristján um lagabreytinguna sem gerði það að verkum að nýrri lán voru sett í forgang.

Enginn vilji til þess að semja

Kristján segir að þegar greiðslukrafan frá LÍN barst honum hafi hann haft sambandi við Lánasjóðinn í von um að hægt væri að semja. Enginn vilji hafi hins vegar verið hjá LÍN til þess og segir hann að LÍN hafi sótt málið af hörku.

Á endanum greiddi Kristján Ari kröfuna, þó með þeim fyrirvara um að hún væri réttmætt. Í von um að leysa málið í sátt fór Kristján Ari tvisvar fyrir stjórn LÍN, meðal annars með sáttaboð, án árangurs.

„Það stóð aldrei til af minni hálfu að hlaupast undan ábyrgðum á því sem ég bæri ábyrgð á,“ segir Kristján en málið fór að lokum fyrir Málskotsnefnd lánasjóðsins.

Í dag fékk Kristján Ari tilkynningu um að hann hefðu unnið málið gegn Lánasjóðinum. Niðurstaða nefndarinnar er sú að lagabreytingin 1992 hafi falið í sér óheimilar og íþyngjandi breytingar gagnvart Kristjáni sem ábyrgðarmanni. Aðgerðir LÍN þessu tengdu hafi verið á ábyrgð sjóðsins og ábyrgðir Kristjáns hafi því fallið niður.

Á Kristján því von á endurgreiðslu frá LÍN en hann gagnrýnir að lánasjóðurinn skuli haga sér eins og hver annar fjárfestingarsjóður.

„Ég er ánægður með að fá þetta fram og ég yrði líka ánægður ef þetta yrði til þess að stoppa þessa framgöngu LÍN. Þetta er fordæmalaus harka í sjóði sem er ætlaður til þess að tryggja jöfnuð til náms.“