Hópur fólks býr á tjaldsvæðinu í Laugardal yfir vetrarmánuðina vegna húsnæðisskorts

Hópur fólks hefur í vetur neyðst til að búa í húsbílum og hjólhýsum á tjaldsvæðinu í Laugardal vegna hás leiguverðs og íbúðaskorts á höfuðborgarsvæðinu. Maður sem hefur dvalið þar síðustu mánuði segir verst að þurfa að fara út á nóttunni til að fara á klósettið.

„Það eru örfáir einstaklingar, Íslendingar, sem hafa valið það að koma hérna til lengri eða skemmri tíma hérna yfir veturinn. Ég ímynda mér að í vetur hafi verið svona þrír til fimm að jafnaði sem hafa dvalið hérna á svæðinu í bílum,” segir Markús Einarsson, framkvæmdastjóri Farfugla og tjaldsvæðisins í Laugardal.

Þetta er í fyrsta skipti sem tjaldsvæðið er opið yfir vetrartímann og ljóst að eftirspurn er eftir því. Fólk dvelur þar mislengi, einhverjir mánuðum saman.

„Kannski frá einum og upp í fjóra, fimm mánuði. Það held ég að sé það algengasta. Við höfum svo sem ekki neina greiningu á því afhverju fólk er hérna. Fyrir suma er þetta lífstíll, sumir eru að koma hérna til skemmri dvalar til að heimsækja ættingja og vini. Fyrir einhverja er þetta lausn vegna þess að menn hafa ekki í önnur hús að vernda. Það er á nokkuð mismunandi forsendum sem fólk er hérna hjá okkur,” segir Markús. 

Fréttastofa ræddi við mann sem hefur undanfarna fjóra mánuði fengið að gista í hjólhýsi sem vinur hans dvelur í á tjaldsvæðinu. Báðir eru mennirnir í fullu starfi.

„Það er mjög erfitt að fá sér íbúð þegar maður er einn hérna á Íslandi. Ég er búin að reyna síðan áður en ég kom til Íslands, í desember, það gengur ekki,” segir maðurinn sem vill ekki koma fram undir nafni.

Þeir sem dvelja á tjaldsvæðinu hafa aðgang að eldunaraðstöðu, rennandi vatni og salerni á farfuglaheiminu Farfuglum sem er á svæðinu.

„Það er straumur sem maður tengir við bílinn og þá verður hiti. Ef það væri ekki straumur myndi það verða mjög erfitt. Fá gashitara og það myndi kosta mikinn pening. En rennandi klósett, það er smá problem. En farfuglaheimilið er alltaf opið. Maður getur alltaf farið þangað. Bara leiðinlegt á nóttunni að klæða sig í föt og fara langt.”