Kaymer kominn í forystu í Abú Dabí

Þjóðverjinn Martin Kaymer er fremstur eftir fyrstu tvo keppnisdagana á HSBC-meistaramótinu sem nú fer fram í Abú Dabí en mótið er hluti af Evrópumótaröðinni í golfi.

Kaymer spilaði frábærlega í dag og kom í hús á 66 höggum, rétt eins og í gær. Hann er á samtals tólf höggum undir pari.

Svíinn Henrik Stenson, sem var með tvegga högga forystu eftir fyrsta keppnidaginn, gaf eftir í dag og er dottinn niður í 6.-9. sætið á níu höggum undir pari samtals.

Spánverjinn Rafa Cabrera Bello spilaði vel í dag og er næstur á eftir Kaymer á ellefu undir pari. Þrír kylfingar koma svo næstir á tíu undir pari.

Kaymer fór rólega af stað í dag og var á einu yfir pari eftir fyrstu sjö holurnar. En svo kom örn á áttundu holu og hann fór svo á mikið flug á seinni níu holunum. Alls fékk hann sex fugla, tvö pör og einn skolla á seinni hluta hringsins í dag.

Kaymer er í 53. sæti heimslistans sem stendur. Hann var efstur í átta vikur árið 2011 og vann opna bandaríska meistaramótið árið 2014. En síðan þá hefur hann ekki unnið mót og átt erfitt uppdráttar.

Sýnt er beint frá mótinu á Golfstöðinni og útsending frá þriðja keppnisdegi hefst klukkan 08.30 í fyrramálið.

Útsening frá PGA-mótinu CareerBuilder Challenge á Golfstöðinni hefst klukkan 20.00 í kvöld.