Litríkir hlauparar og Coca-Cola trukkar í Color Run

Litahlaupið, eða Color Run, hófst í morgun klukkan 11 þegar hlauparar voru ræstir út við Hljómskálagarðinn. Búist var við því að yfir 10 þúsund manns legðu leið sína í miðbæinn vegna hlaupsins en ljóst er að margt var um manninn á svæðinu í dag.

Lögreglan bað hlaupara og áhorfendur um að virða götulokanir og skilja bíla eftir heima í dag. Athygli vakti að á einhverjum stöðum voru stórir Coca-Cola sendiferðabílar notaðir til að loka götum fyrir litríka hlaupara.

Þá var eftir því tekið meðal viðstaddra að sérsveitarmenn höfðu eftirlit með hlaupinu í miðborginni auk almennra lögregluþjóna en nánar verður fjallað um hlaupið og gæslu þess í fréttatíma Stöðvar 2 í kvöld.

Greinilegt er að glatt var á hjalla meðal litahlaupara sem voru duglegir að setja myndir af litadýrðinni inn á samfélagsmiðla.