Yfirvöld í Gíbraltar taka rússneska risasnekkju í vörslu sína

Yfirvöld í Gíbraltar hafa tekið risasnekkju rússnesks auðjöfurs í sína vörlu eftir að þýskur framleiðandi snekkjunnar segir eiganda snekkjunnar enn skulda 15,3 milljónir evra, um 1,8 milljarða króna.

BBC greinir frá því að snekkja auðjöfursins Andrey Melnichenko, Sailing Yacht A, hafi verið föst við Gíbraltar, allt frá á miðvikudaginn í síðustu viku. Talsmaður Melnichenko segist gera ráð fyrir að auðjöfurinn fái brátt að sigla henni á brott á ný.

Snekkjan er skráð á Bermúda og var smíðuð af Nobiskrug og var siglt frá skipasmíðastöðinni í Kiel í norðurhluta Þýskalands fyrir hálfum mánuði.

Snekkjan er 143 metrar á lengd, með þrjú möstur, þar af eitt sem er um hundrað metrar á hæð. Hún vegur um 12.600 tonn og er talin hafa kostað að minnsta kosti 47 milljarða króna.

Melnichenko hefur auðgast mikið á framleiðslu áburðar og í kola- og orkugeiranum. Auður hans er metinn á 13,2 milljarða Bandaríkjadala.

Að neðan má sjá innslag Wall Street Journal um risasnekkjuna.