Grunaður höfuðpaur í stóru fíkniefnamáli tekinn í Keflavík sex árum síðar

Hæstiréttur hefur staðfest úrskurð Héraðsdóms Reykjaness þess efnis að Einar Sigurður Einarsson, grunaður höfuðpaur í umfangsmiklu fíkniefnamáli, skuli sæta farbanni á meðan mál hans er til meðferðar fyrir héraðsdómi en þó ekki lengur en til 8. maí næstkomandi. Hann var handtekinn á mánudaginn í Leifsstöð.

Einar er einn af þremur mönnum sem voru ákærðir í janúar 2014 fyrir að hafa staðið að innflutningi á um 30 þúsund e-töflum hingað til lands í ágúst 2011.

Samkvæmt ákæru á Einar Sigurður að hafa afhent Einari Erni Adolfssyni, sem einnig var ákærður vegna málsins, fíkniefnin í Amsterdam í Hollandi. Þá á hann einnig að hafa greitt hluta ferðakostnaðar og uppihald Einars Arnar sem flutti efnin svo frá Danmörku til Íslands en Einar Örn var á þessum tíma 17 ára gamall.

Var í farbanni í Ástralíu

Skipta þurfti málinu upp og gefa út tvær ákærur því Einar Sigurður var í farbanni í Ástralíu en þar var hann búsettur. Upphaflega var ein ákæra gefin út í júní 2013 á hendur þremenningunum, þeim Einari Sigurði, Einari Erni og Finni Snæ Guðjónssyni.

Í þinghaldi í september sama ár kom fram að Einar væri í farbanni í Ástralíu og vegna þess var málinu skipt upp í janúar 2014.  Einar Sigurður sætti farbanni í Ástralíu allt til 4. september 2015 en ekki hafa fengist upplýsingar um það hvers vegna hann var í farbanni.

Í aðdraganda fyrirtöku málsins í janúar 2016 var Einari birt ákæran og fyrirkall að nýju þar sem hann var búsettur í Ástralíu, en fyrir liggur að hún var áður birt honum í aðdraganda þingfestingar málsins í mars 2014, þá einnig í Ástralíu.

Kom til Íslands í byrjun ársins

Einar kom til Íslands í byrjun þessa árs og mun nú vera búsettur hér á landi. Hann var handtekinn á mánudaginn í Leifsstöð en hann átti bókað flug frá Keflavíkurflugvelli síðastliðinn laugardag. Hann mætti hins vegar ekki í flugið þá en var tveimur dögum síðar kominn á flugvöllinn þar sem hann var handtekinn.

Ákæruvaldið krafðist þess að hann yrði dæmdur í farbann þar sem ekki væri að sjá af gögnum málsins að Einar Sigurður hefði gert nokkurn reka að því að koma fyrir dóm og svara til saka þó svo að hann hefði í tvígang verið kallaður til þess.

„Í ljósi alls þessa og hinna alvarlegu sakargifta sem varnaraðili er borinn í sakamálinu, en í ákæru er honum gefið að sök brot gegn 173. gr. a. almennra hegningarlaga nr. 19/1940, en brot gegn ákvæðinu varðar allt að 12 ára fangelsi, þykir mega ætla að varnaraðili muni reyna að komast úr landi, leynast eða koma sér undan málssókn með öðrum hætti fari hann frjáls ferða sinna,“ segir í úrskurði héraðsdóms um farbannið sem Hæstiréttur staðfesti eins og áður sagði.

Þeim hluta málsins sem sneri að þeim Einari Erni og Finni Snæ lauk í febrúar í fyrra þegar þeir hlutu hvor um sig fjögurra ára skilorðsbundinn dóm til þriggja ára fyrir sína aðild að smyglinu.

Áður höfðu þeir hlotið fangelsisdóma til sex ára en Hæstiréttur ómerkti þá vegna vanhæfis Ástríðar Grímsdóttur, héraðsdómarar, sem hafði áður komið að málinu þegar hún úrskurðaði annan manninn í gæsluvarðhald.