Einkaaðili í Póllandi rannsakar hvarfið á Arturi

Fjölsklda Arturs Jarmoszko, sem saknað hefur verið í fjörutíu daga, hefur ráðið einkaaðila í Póllandi til að rannsaka hvarfið á honum. Þá hafa pólskir miðlar sýnt málinu áhuga og segir pólskur blaðamaður sem staddur er hér á landi að mörgum spurningum sé ósvarað í tengslum við málið.

Arturs hefur verið saknað frá 1. mars síðastliðinum. Hann er 26 ára karlmaður frá Póllandi en hefur verið búsettur á Íslandi í nokkur ár. Þriðjudaginn 28. febrúar fór hann einn í Laugarásbíó og notaði hann strætó til að komast þangað. Eftir sýninguna fór hann niður í miðbæ Reykjavíkur þar sem hann sást taka peninga úr hraðbanka í eftirlitsmyndavél. Nokkru síðar greindi símamastur við Kársnes í Kópavogi merki úr síma Arturs.

Björgunarsveitarmenn og þyrla landhelgisgæslunnar leituðu hans í á svæðinu frá Gróttu og að Álftanesi, en þeirri leit var formlega hætt eftir nokkra daga, án árangurs.  

Fjölskylda Arturs óttast að Arturi hafi verið unnið mein og eru gagnrýnin á lögregluna hér á landi og segja hana ekki hafa sinnt rannsókn málsins nægilega. Þau ákváðu því að ráða pólskan einkaaðila til að rannsaka málið, en slíkt tíðkast í Póllandi.

Þá hafa pólskir fjölmiðlar sýnt málinu áhuga og er pólskur blaðamaður staddur hér á landi í þeim tilgangi að fjalla um málið. Hann telur að það sé mörgum spurningum ósvarað í málinu og tekur undir gagnrýni fjölskyldu Arturs. Robert hefur verið í sambandi við einkaaðilann sem hann segir að muni koma hingað til lands á allra næstu dögum.

Guðmund­ur Páll Jóns­son lög­reglu­full­trúi seg­ir að rannnsókn málsins sé enn í gangi þó formlegri leit hafi verið hætt, nema nýjar vísbendingar berist. Hann segir lögreglu vera meðvitaða um rannsókn einkaaðilans í Póllandi á málinu en að ekki standi til að lögreglan verði partur af þeirri rannsókn sem stendur. Þá segir hann ekkert benda til þess að eitthvað saknæmt hafi átt sér stað.