Felipe Massa hættir í Formúlu 1

Felipe Massa ökumaður Williams liðsins hefur tilkynnt að hann ætli að leggja hjálminn á hilluna frægu eftir að tímabilinu í ár lýkur.

Massa var búinn að ákveða að hætta eftir tímabilið í fyrra og var búinn að kveðja senuna. Þá hætti Nico Rosberg óvænt en hann varð heimsmeistari ökumanna í fyrra með Mercedes. Það þurfti því að finna ökumann í Mercedes bílinn og var Valtteri Bottas kallaður til, fyrrum ökumaður Williams.

Á sama tíma var ljóst að Lance Stroll, hinn 18 ára Kanadamaður var að fara að taka sæti hjá liðinu og Williams vildi setja reynslumikinn ökumann honum við hlið. Það þýddi að einfaldast var að kalla Massa aftur úr steininum helga og fá hann til að keppa á ný. Sú varð raunin.

Williams liðið hefur verið að vega og meta ökumenn sem koma til greina sem eftirmenn Massa hjá liðinu. Paul di Resta, Pascal Wehrlein og Robert Kubica eru þeir þrír sem helst þykja koma til greina.

Massa fær tækifæri til að kveðja með glans á heimavelli í Brasilíu næstu helgi þegar næst síðasta keppni tímabilsins fer fram.