Æskuvinir vottuðu fyrir Robert Downey

Í samræmi við úrskurð úrskurðarnefndar um upplýsingamál sem birtur var á vef dómsmálaráðuneytisins fyrr í dag veitti ráðuneytið rétt í þessu aðgang að gögnum sem Robert Downey, áður Róbert Árni Hreiðarsson, lagði fram með beiðni sinni um uppreist æru.

Í umsókn sinni um uppreist æru skrifaði Robert Downey meðal annars:

„Þar sem nú eru liðin rúm tvö og hálft ár frá því að ég lauk afplánun og þar sem ég hef síðan lifað reglusömu og heiðarlegu lífí, leyfi ég mér að fara þess á leit, að mér verði veitt uppreisn æru því er þetta varðar.“

Með umsókn sinni skilaði Robert Downey þremur vottorðum. Vottorðin skrifuðu Viðar Marel Jóhannsson, Gautur Elvar Gunnarsson og Halldór Einarsson. Umsóknin var stipluð þann 17. september 2014.

Þrír einstaklingar vottuðu fyrir Robert Downey. Halldór Einarsson vinur Roberts frá barnæsku, Viðar Marel Jóhannsson vinur Roberts í 45 ár og Gautur Elvar Gunnarsson lögfræðingur sem segist í sínu bréfi hafa þekkt Róbert um langa hríð bæði persónulega og í starfi.

Sendi ítrekun eftir fréttir um uppreist æru

11. apríl 2016 sendi Robert Downey ítrekun á beiðni sinni á innanríkisráðuneytið. Bréfið var stílað á Ólaf Ragnar Grímsson og Ólöfu Nordal. Í ítrekun sinni óskaði Robert eftir svari eigi síðar en 1. maí sama ár. Bað hann um að fá svör líka í tölvupósti þar sem hann væri mikið erlendis.

„Ég fékk reynslulausn hinn 2. febrúar 2011 og hef ekki gerst brotlegur við þær reglur, sem um afplánun gilda og leitt gætu til þess, að ákvörðun um veitingu reynslulausnar væri afturkölluð. Það eru því liðin rúm fimm ár síðan ég lauk afplánun refsingar og í ljósi síðustu frétta af veitingu uppreinsar æru, tel ég rétt að ítreka beiðni mína nú. En sá aðili, sem hana síðast fékk, að ég best veit, hafði fengið margfallt þyngri dóm en ég.“

Hegðað sér óaðfinnanlega

„Ég hef þekkt Robert frá barnæsku og get ég fullyrt með góðri samvisku, að hann hefur hegðað sér óaðfinnanlega í lífi og starfi frá því, að hann kom úr fangelsi. Á milli okkar er mikil og góð ævavarandi vinátta, traust og trúnaður,“ skrifaði Halldór Einarsson í sínu bréfi til innanríkisráðuneytisins. Halldór er eigandi Henson sem framleitt hefur íþrótafatnað undir samnefndu merki í tugi ára.

Gautur Elvar Gunnarsson segist hafa þekkt Róbert Árna Hreiðarsson um langa hríð. Skrifaði hann meðal annars:

„Þekki ég hann af góðu einu, bæði í persónulega í starfi. Ég mæli eindregið með því að Róbert fái uppreisn æru og tel ég hann verðugan til þess. Þá veit ég til þess að hann hefur hagað sér óaðfinnanlega síðan hann fékk reynslulausn.“

„Endurtekur sig ekki“

„Dugnaður, ósérhlífni, hjálpsemi eru þau orð sem koma upp í hugann, þegar lýsa á Róbert Árna Hreiðarssyni Downey. Ég hef þekkt Róbert Árna í rúm 45 ár og hefur aldrei borið skugga á vinskap okkar. Róbert Árna er gott að eiga að vini. Hann er alltaf reiðubúinn að rétta fram hjálparhönd og vera vinur vina sinna. Hann hefur alla tíð reynst mér traustur og heiðarlegur bæði sem ráðgjafi og vinur,“ skrifar Viðar Marel Jóhannson í sinni umsögn.

Segir hann enn fremur að allir sem til þekkja geti borið vitni um að Róbert Árni muni í alla staði reynast traustsins verður.

„Ég veit, að mannkostir hans munu reynast honum vel, og að slíkt, sem hann var dæmdur fyrir endurtekur sig ekki.“

Robert Downey fékk uppreist æru þann 16. september í fyrra. Hæstiréttur staðfesti svo í júní síðastliðnum úrskurð Héraðsdóms Reykjavíkur um að Robert gæti fengið lögmannsréttindi sín á ný. Hann var dæmdur í þriggja ári fangelsi árið 2008 fyrir kynferðisbrot gegn nokkrum ungum stúlkum.