Augljóst mynstur í fléttum Ólafs að sögn Björns Jóns

Björn Jón Bragason sagnfræðingur segir að þegar hann skoðaði einkavæðingu Búnaðarbankans á sínum tíma hafi hann séð augljóst mynstur í viðskiptum Ólafs Ólafssonar. Í tímariti Sögufélagsins frá árinu 2011 skrifaði hann grein sem fjallaði um þegar Búnaðarbankinn var seldur og rifjaði Björn þar upp að aðkoma Hauck & Aufhäuser að Búnaðarbankanum minnti um margt á fjárfestingu Bruno Bischoff í Samskipum. Ári síðar skrifaði hann svo grein í tímaritið Þjóðmál sem hét Falið eignarhald Ólafs Ólafssonar í kjölfar Al-Thani ákærunnar.

„Mér fannst, þegar ég var að skrifa um þetta á sínum tíma, ég sjá ákveðið mynstur. Það var augljóst sem hefur svo komið á daginn,“ segir Björn.

Erlendir leppar Ólafs Þýska skipafyrirtækið Bruno Bischoff – Samskip Þýska skipafyrir­tækið Bruno Bischoff keypti 34 prósenta hlut í gegnum eignarhaldsfélagið NAT, North Atlantic Transport, árið 1994 í Samskipum. Eftir að tilkynnt var að þrír hluthafa væru á leiðinni út úr fyrirtækinu kom í ljós að Ólafur átti NAT. Þýski bankinn Hauck & Aufhäuser – Búnaðarbankinn Staðfest var með skýrslu RNA að bankinn var leppur fyrir kaup á hlut í Búnaðarbankanum árið 2003. Ólafur stýrði verkefninu frá a-ö. Serafin Shipping – Icelandic group Árið 2005 eignaðist félagið Serafin Shipping Corp. 5,96 prósenta hlut í Icelandic group. Því var slitið skömmu síðar, hlutnum ráðstafað til Fordace Limited og Deeks Associates. Félögin tvö eru bæði skráð á Tortóla, stofnuð í júní 2005. Mohamed bin Khalifa Al-Thani – Kaupþing Sýndarviðskipti sem Ólafur var dæmdur í fjögurra og hálfs árs fangelsi fyrir. Ólafur hafði milligöngu um kaupin og var lán sjeiksins fjármagnað með láni frá Ólafi sem fékk lán frá Kaupþingi í gegnum félag sitt, Serafin Shipping. Corp.

Í grein sinni frá 2011 segir Björn að þegar Ólafur varð forstjóri Samskipa á sínum tíma hafi verið stærsta verkefni hans að finna kaupanda að kjölfestuhlut í félaginu. 

Hann hafi leitað víða erlendis og kynnst Christian Smitd, bankastjóra Société Générale í Hamborg. Skömmu síðar komst hann í samband við eigendur þýska skipafélagsins Bruno Bischoff í sambandsríkinu Bremen og skyldu þeir eignast 34 prósenta hlut í Samskipum í gegnum eignarhaldsfélagið NAT, North Atlantic Transport, sem Ólafur átti í raun og veru en leyndi eignarhaldinu.

Bruno Bischoff var kynnt fyrir íslenskum fjárfestum sem traust, og rótgróið fyrirtæki og úr varð að íslensk stórfyrirtæki og fjárfestingarsjóðir komu með nýtt hlutafé. 

Rúmu ári síðar fór eignarhaldsfélagið Hof úr hluthafahópnum eftir að raunverulegt eignarhald NAT kom í ljós. 

Fréttin birtist fyrst í Fréttablaðinu