Íslensku strákarnir komust allir áfram

GR-ingarnir Haraldur Franklín Magnús, Andri Þór Björnsson og Guðmundur Ágúst Kristjánsson eru allir þrír komnir áfram á annað stig úrtökumótsins fyrir Evrópumótaröðina í golfi en fyrsta úrtökumótið kláraðist í dag.

Guðmundur Ágúst Kristjánsson var þeirra tæpastur en hann var 23. og síðasti kylfingurinn sem komst í gegnum fyrsta stigið á úrtökumótinu á Frilford Heath vellinum á Englandi.

Guðmundur Ágúst lék frábærlega á lokadeginum þar sem hann kláraði á 67 höggum eða fimm höggum undir pari. Hann fékk sex fugla á holunum átján en skollinn á lokaholunni varð honum sem betur fer ekki að falli.

Andri Þór Björnsson endaði í áttunda sæti og Haraldur Franklín varð í átjánda sæti. Allir þrír eiga það sameiginlegt að koma áfram í fyrstu tilraun við úrtökumótið fyrir Evrópumótaröðina.

Andri Þór lék mjög vel á lokadeginum eða á fjórum höggum undir pari. Það var hans besti hringur á mótinu. Haraldur Franklín Magnús kláraði síðasta hringinn á pari eftir að hafa leikið á fjórum höggum undir pari í gær.

Átta íslenskir karlkylfingar reyndu við fyrsta stigið í ár og komust fjórir þeirra áfram sem allir eiga það sameiginlegt að koma úr GR. Þórður Rafn Gissurarson hafði áður komist áfram.

Birgir Leifur Hafþórsson, Ólafur Björn Loftsson, Axel Bóasson og Pétur Freyr Pétursson komust hinsvegar ekki áfram að þessu sinni.

Annað stig úrtökumótsins fer fram á fjórum keppnisvöllum á Spáni dagana 4. til 7. nóvember næstkomandi.