Simmons valinn númer eitt

Philadelphia 76ers valdi Ben Simmons með fyrsta valrétti í nýliðavali NBA-deildarinnar sem fór fram með pompi og prakt í Barclays Center í Brooklyn í gær.

Simmons er 19 ára ástralskur framherji sem kemur úr LSU háskólanum. Hann var með 19,2 stig, 11,8 fráköst og 4,8 stoðsendingar að meðaltali í leik fyrir LSU á síðasta tímabili.

Síðustu ár hafa verið erfið hjá Philadelphia en liðið vann aðeins 10 af 82 leikjum sínum á síðasta tímabili. Stuðningsmenn liðsins sjá fram á bjartari tíma eftir komu Simmons.

Þetta er í fyrsta sinn í 20 ár sem Philadelphia fær fyrsta valrétt en þá valdi liðið Allen Iverson sem var ánægður með valið á Simmons.

Congratulations @BenSimmons25. I know you'll make all of us Philly fans proud!!

— Allen Iverson (@alleniverson) June 23, 2016

Los Angeles Lakers, sem var með næstversta árangur allra liða í NBA á síðasta tímabili, valdi framherjann Brandon Ingram frá Duke háskólanum með öðrum valrétti.

Lakers fékk einnig annan valrétt í fyrra og valdi þá D'Angelo Russell en þeir Ingram eiga að vera hornsteinarnir í nýju liði Lakers.

Annað stórveldi, Boston Celtics, tók framherjann Jaylen Brown frá Californiu með þriðja valrétti og Phoenix Suns valdi Króatann Dragan Bender með þeim þriðja.

Tíu efstu menn í nýliðavalinu 2016:

1. Ben Simmons - Philadelphia 76ers

2. Brandon Ingram - LA Lakers

3. Jaylen Brown - Boston Celtics

4. Dragan Bender - Phoenix Suns

5. Kris Dunn - Minnesota Timberwolves

6. Buddy Hield - New Orleans Pelicans

7. Jamal Murray - Denver Nuggets

8. Marquese Chriss - Sacramento Kings

9. Jakob Pöltl - Toronto Raptors

10. Thon Maker - Milwaukee Bucks