Ólafur njósnar um Portúgal: Agaðari en við eigum að venjast

„Mér líður eins og ég sé orðinn góðvinur leikmannanna,“ segir Ólafur Kristjánsson, verðandi þjálfari Randers í Danmörku og svokallaður njósnari fyrir íslenska landsliðið.

Ég hitti Ólaf í miðbæ Annecy, bæjarins fagra sem íslenska landsliðið mun kalla heimili sitt næstu vikurnar. Íslenska liðið er nú búið að dvelja þar í nokkra dag en þetta var fyrsta ferð Ólafs inn í miðbæinn.

„Ég hef einfaldlega verið á fullu að vinna,“ segir Ólafur sem hefur haft það hlutverk að leikgreina lið Portúgals fyrir þá Lars Lagerbäck og Heimi Hallgrímsson landsliðsþjálfara.

Ólafur hefur vitanlega séð alla leiki Portúgals í undankeppni EM og vináttulandsleikina þar að auki. Hann var á staðnum þegar Portúgal mætti bæði Englandi og Noregi en eftir þá unnu Portúgalar afar sannfærandi 7-0 sigur á Eistlandi.

Ólafur segir að þó svo að öllum sé ljóst að Portúgal sé með ógnarsterkt lið með Cristiano Ronaldo, einn besta leikmann heims, fremstan í flokki, hafi öll lið sínar brotalamir og veikleika.

„Við vitum að menn eins og Ronaldo, Ricardo Quaresma, Nani og fleiri eru frábærir knattspyrnumenn en þeir eru mannlegir eins og aðrir og eiga sínu slæmu daga,“ segir Ólafur. „En þeir vita líka mjög vel hverjir þeirra styrkleikar eru og þeir eru góðir að keyra sig upp í að nýta þá til hins ýtrasta.“

Einbeittir og agaðir

Ólafur vill eðlilega ekki tjá sig mikið um hvernig Ísland á að leggja upp leikinn gegn Portúgal á þriðjudag, það sé hlutverk þjálfaranna. En hann segir að Ísland eigi ávallt möguleika, nái okkar menn sínu besta fram.

„Okkar möguleikar felast í því að vera jafn grimmir og ákveðnir og við vorum í stóru leikjunum í undankeppninni. Að sama skapi verður maður að vona að Portúgal komist ekki í fimmta gír.“

Hann segir ólíklegt að gera á einhvern hátt ráð fyrir því að lið Portúgals muni vanmeta lið Íslands og sýna kæruleysi í fyrsta leik sínum á EM.

„Ef það gerist þá verður það algjörlega ómeðvitað. Þjálfarinn þeirra hefur líka talað þannig að það séu allir mjög einbeittir og agaðir. Ísland fór í gegnum erfiðan riðil í undankeppninni og það er ekki hægt að vanmeta neitt lið sem er komið inn á EM.“

Tími Portúgals loks kominn?

Eins og Ólafur bendir réttilega á hefur Portúgal aldrei náð að standa almennilega undir væntingum á stórmótum eftir að liðið komst í úrslitaleikinn á EM 2004 á heimavelli, þá með Ronaldo ungan innanborðs.

„Við höfum þekkt Portúgal sem mikið sóknarlið en staðreyndin er sú að liðið í dag er mjög agað, líka án bolta og í varnarleik sínum. Það getur svo beitt afar fjölbreyttum sóknarleik og þeir eru til dæmis ekki smeykir við að senda upp langa bolta og fara á bak við andstæðinginn. Þeir geta líka farið í fyrirgjafir mjög snemma. Það er verið að spila á mjög marga strengi hjá þeim.“

Ólafur segir erfitt að setja leikkerfi Portúgals í ákveðinn flokk. Leikstíll liðsins sé breytilegur. „Spila þeir 4-4-2 eða 4-3-3? Þú getur alveg eins sagt að þeir spili 7-9-13. Það er það mikil hreyfing og skilningur hjá þessu liði,“ segir Ólafur sem segir að liðið geti farið langt í Frakklandi.

„Helstu veikleikar liðsins felast ef til vill í því að það er farið að hægjast á miðvörðunum þeirra. Það gæti hentað liðinu illa að spila gegn liði með snögga framherja. Portúgal gæti því farið langt en getur líka lent snemma á liði sem hentar því illa.“

Leikur Íslands og Portúgals fer fram í St. Etienne á þriðjudag.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).