Keyptur fyrir samtals ellefu milljarða með 202 daga millibili

Kólumbíski framherjinn Jackson Martínez varð í gærkvöldi dýrasti leikmaðurinn í sögu kínverska fótboltans þegar meistararnir í Guangzhou Evergrande keyptu hann frá Atlético Madrid fyrir 42 milljónir evra eða því sem nemur sex milljörðum íslenskra króna.

Það að kínverskt lið borgi svo mikið fyrir leikmann kemur ekkert á óvart þar sem miklir peningar eru í fótboltanum þar í landi þessi misserin og verið er að lokka stórstjörnur þangað til að spila.

Brasilíumaðurinn Ramires var t.a.m. seldur frá Chelsea til Íslendingaliðsins Jiangsu Suning í janúar fyrir 33 milljónir evra eða tæpa 4,7 milljarða íslenskra króna.

Það sem kemur á óvart í þessu er að Jackson Martínez kom til Atlético Madrid bara síðasta sumar, en mikið var látið með þennan öfluga Kólumbíumann í Portúgal þar sem hann sló í gegn með Porto og skoraði 92 mörk í 132 leikjum í öllum keppnum á þremur árum.

Martínez náði sér aldrei á strik fyrir Atlético Madrid sem borgaði 35 milljónir evra fyrir hann eða fimm milljarða íslenskra króna. Hann skoraði aðeins þrjú mörk í 22 leikjum í öllum keppnum.

Þrátt fyrir að vera ekki allra stærsta nafnið í bransanum var Jackson Martínez keyptur fyrir samtals 77 milljónir evra eða ellefu milljarða íslenskra króna með 202 daga millibili, en félagaskipti hans til Atlético voru staðfest 15. júlí síðasta sumar.

Sala hans frá Porto til Atlético gerði Kólumbíumanninn að 38. dýrasta leikmanni allra tíma, en hann kostaði meira en Karim Benzema frá Lyon til Real Madrid, Diego Costa frá Atlético til Chelsea og Luka Modrid frá Tottenham til Real Madrid.

Brasilíumaðurinn Luiz Felipe Scolari er þjálfari Guangzhou Evergrande sem unnið hefur kínversku úrvalsdeildina undanfarin fimm ár.