Segir óvíst að spítalinn lifi af frekari bið

Jóhannes M. Gunnarsson, læknisfræðilegur verkstjóri um byggingu nýs Landspítala, segir starfsemi spítalans ekki þola nýja staðarvalsgreiningu eða frekari bið. Ummæli forsætisráðherra um að reisa eigi spítala við Vífilsstaði séu til þess fallin að skapa óöryggi og erfiðleika.

„Ummælin eru mjög óvænt og skapa ákveðna erfiðleika. Það er búið að tala um þessa uppbyggingu við Hringbraut síðan upp úr árinu 2000 og ákvörðun lá fyrir árið 2001 eftir fyrstu skoðun. Síðan hefur þetta margoft verið skoðað og margoft verið í umræðunni,“ segir hann.

Orð ráðherrans vegi þyngra en orð mannsins á götunni

Sigmundur Davíð Gunnlaugsson forsætisráðherra lýsti því fyrir fyrir helgi að stjórnvöld ættu að bregðast við tilboði Garðabæjar um að ráðast í uppbyggingu nýs Landspítala við Vífilsstaði. Hann sagðist alltaf hafa haft þá stefnu að gera ekkert sem gæti tafið nauðsynlegar úrbætur við Hringbraut eða framtíðaruppbyggingu þar. Núna hins vegar sé rétti tíminn til að ræða hvort betra geti verið að reisa nýjan spítala annars staðar en við Hringbraut, líkt og fyrirhugað er.

„Þetta er náttúrulega mjög óþægilegt gagnvart framkvæmdinni þegar hún er í rauninni komin af stað, að þetta komi úr þessari átt. Þetta eru þyngri orð heldur en kannski mannsins á götunni. Það er auðvitað og eðlilega skoðanamunur um það hvar eigi að byggja upp svona stórar stofnanir en það er búið að vinna að þessu í öll þessi ár og þetta veldur óöryggi,“ segir Jóhannes. Allar staðsetningar hafi sína kosti og galla og ótækt sé að frekari bið verði á framkvæmdunum.

Þolir enga bið

„Spítalinn þolir ekki neina bið. Hann er í rauninni sprunginn eins og hver maður veit. Ef það væri farið að byrja upp á nýtt með nýju þrasi um staðsetningu, því það verður auðvitað alltaf. Það eru allar staðsetningar sem hafa einhverja ókosti og einhverja kosti. Það yrði þá nýtt mat á því með öllum þeim ótal skoðunum sem fólk virðist nú hafa á flestum hlutum, jafnvel þó það hafi ekki kynnt sér staðreyndirnar mjög mikið. En ég held að starfsemin þoli það ekki að þetta dragist eitthvað. Við erum fallin á tíma með þetta. Spítalinn er sprunginn.“

Sjálfur segist hann þeirrar skoðunar að nýjan spítala eigi að reisa við Hringbraut.

„Það sem kannski vegur þyngst að mínu mati eru akkúrat tengslin við þetta háskólaumhverfi sem þarna er og tengslin við heilbrigðisvísindasvið Háskóla Íslands og þær greinar sem eru í Háskólanum í Reykjavík sem tengjast þessari starfsemi er megin ástæðan fyrir því að hann sé best settur þarna.“

Kristján Þór Júlíusson heilbrigðisráðherra vildi ekki tjá sig um málið þegar eftir því var leitað. Hann sagði að fyrst þyrfti þingflokkurinn að fara yfir þessi mál, sem eflaust verði í dag eða næstu daga.