Pizza 67 gjaldþrota

P67 ehf. sem rak pítsa staði á Grensásveginum og í Grafarvogi undir merkjum Pizza 67 hefur verið lýst gjaldþrota. Þetta kemur fram í Lögbirtingarblaðinu í dag.

Staðurinn í Grafarvogi opnaði í árslok 2014 en á staðurinn Grensásveginum opnaði síðasta sumar. Þeim stað var lokað undir lok síðasta árs í kjölfar þess að rafmagnið var tekið af staðnum vegna ógreiddra rafmagnsreikninga.

Þá kvartaði Einar Hrafn Björnsson fyrrum starfsmaður Pizza 67, yfir framferði stjórnenda fyrirtækisins. Hann sagði P67 skulda sér 950 þúsund krónur í ógreidd laun.

Sjá einnig: Endurkoma Pizza 67: „Höfum þurft að ganga í gegnum helvíti“

„Ég og sambýliskonan mín höfum þurft að ganga í gengum helvíti vegna þess að ég fékk ekki laun og þurfum við ma að fá lán til þess að bókhald okkar gengi upp með tilheyrandi kostnaði. Ég á við hjartasjúkdóm að stríða sem allir 3 eigendur P67 ehf vissu en samt sem áður er þeim alveg sama þó ég sé að farast úr kvíða,“ sagði Einar.

Anton Traustason, eigandi P67, viðurkenndi að félagið skuldi honum og fleiri aðilum laun auk þess eftir ætti að greiða verkalýðsfélögum og lífeyrissjóðum. En öllum yrðu greidd laun.

Anton var ósáttur við að Einar væri að tala fyrirtækið niður og fannst hlægilegt að hann bæri fyrir sig hjartveiki. „Hvað er hann að taka að sér þessa stöðu ef hjartað hans leyfir það ekki?“

Í kjölfarið var Pizza 67 auglýst til sölu á söluvefnum Bland.is.